Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ Վայոց ձորի մարզպետը մասնակցել է Արենի համայնքում կայացած <<Արենի գինու փառատոն>>-ին 03.10.2015
Այսօր Վայոց ձորի մարզի Արենի համայնքում նշվում էր գինու տոնը, տոնակատարություն, որը դարձել է ավանդույթ և մեծ մասսայականություն ու սեր է վայելում ոչ միայն Հայաստանում, այլև մեր երկրի սահմաններից դուրս: Գինու 7-րդ ավանդական փառատոնի կազմակերպիչներն են ՀՀ Վայոց ձոր մարզպետարանը, ՀՀ տարածքային կառավարման և արտակարգ իրավիճակների նախարարությունը, ՀՀ էկոնոմիկայի նախարարությունը, ՀՀ գյուղատնտեսության նախարարությունը, "Արենի գինու փառատոն" հիմնադրամը, Հայաստանի համայնքների միությունը և Հայաստանի զարգացման հիմնադրամը: Ողջ Արենիում տարածվել էր անուշահամ գինու բույրը, որին միախառնվել էին հայկական ավանդական ճաշատեսակների հոտը, ժողովրդական և ազգագրական երգն ու պարը և բազմահազար այցելուների ու զբոսաշրջիկների բարձր և ուրախ տրամադրությունը: Փառատոնի բացման հանդիսավոր արարողությունը սկսվեց տասնյակից ավելի գինեգործական ձեռնարկությունների շքերթով: Գինեգործական ընկերությունների ներկայացուցչիները խաղողով լի զամբյուղները դատարկեցին "չանի" մեջ: Վայոց ձորի մարզպետ Հարություն Սարգսյանը "չանում" ավելացրեց անցյալ տարվանից պահված խորհրդանշական գինին, որից հետո Արենի գյուղի երիտասարդները "չանի" մեջ ոտքերով տրորեցին խաղողը՝ ներկաներին ցուցադրելով մեր պապերից եկած գինու ստացման ավանդական եղանակը: Քամված խաղողահյութը տեղափոխվեց մեկ այլ տարայի մեջ, որը կպահվի հաջորդ տարի ավանդույթ դարձած ծիսակատարության ժամանակ օգտագործելու համար: Ողջ Արենիում տիրում էր տոնական տրամադրություն՝ համեմված գինով, ժողովրդական երգ ու պարով: Պարում էին ոչ միայն Արենի ժամանած ազգային տարբեր համութներ, ալյև ողջ ժողովուրդը, նույնիսկ արտասահմանից եկած զբոսաշրջիկներ և հյուրեր: "Արենի գինու փառատոն"-ը նպաստում է ազգային ավանդույթների պահպանմանը, գինեգործության մշակույթի տարածմանը և մարզում զբոսաշրջության զարգացմանը:
Տեղեկատվություն 02.10.2015
2015 թվականի սեպտեմբեր ամսվա ընթացքում Վայոց ձոր մարզի ծննդօգնություն իրականացնող բուժհաստատություններում ընդունված ծնունդների մասին` ըստ տարածաշրջանների:
ՀՀ Վայոց ձորի մարզպետը մասնակցել է Ռինդ համայնքի օրվան նվիրված տոնահանդեսին 02.10.2015
Հոկտեմբերի 2-ին ՀՀ Վայոց ձորի մարզպետ Հարություն Սարգսյանը մարզպետի տեղակալներ Սամվել Թարվերդյանի և Մելս Հարությունյանի ուղեկցությամբ այցելել է Ռինդի համայնք, մասնակցել համայնքի օրվան նվիրված տոնահանդեսին: Մինչ տոնահանդեսի սկսելը մարզպետի և համայնքի ղեկավարի գլխավորությամբ հյուրերն ու տոնակատարության մասնակիցները ծաղիկներ խոնարհեցին համայնքի փառքի պուրակում տեղադրված Հայոց Մեծ եղեռնի նահատակների, Հայրենական Մեծ պատերազմում և Արցախյան ազատամարտում զոհված ռինդցիների հիշատակը հավերժացնող հուշակոթողներին: Տոնահանդեսի բացման խոսքով հանդես եկավ համայնքի ղեկավար Հուսիկ Սահակյանը: Տոնահանդեսի մասնակիցներին ուղղված ողջույնի իր խոսքում ռինդցիներին հաջողություններ , առատ բերք ու բարիք և ստեղծածի բարի վայելում ու խաղաղ կեցություն մաղթեց մարզպետ Հարություն Սարգսյանը և շնորհակալագրեր հանձնեց մի շարք բարեգործների և համայնքային ծրագրերի իրականացմանն աջակցող անձանց: Պարգևատևումներ եղան նաև համայնքի ղեկավարի կողմից: Առատորեն պատրաստված սեղաններին մոտեցող բոլոր հյուրերը համտեսում էին ցուցադրվող բարիքները և հայտնում իրենց ուրախությունը ընթացիկ տարում կարկտահարությունից տուժած ռիդցիների աշխատասիրության, ստեղծելու և արարելու անկոտրուն կամքի համար: Մինչև ուշ երեկո հնչում էր ուրախ երգն ու պարը, որն ավարտվեց տոնական հրավառությամբ:
ՀՀ Վայոց ձորի մարզպետ Հարություն Սարգսյանի ելույթը Ռինդ համայնքի օրվան նվիրված տոնակարատությանը 02.10.2015
Սիրելի ռինդցիներ, հարգարժան հյուրեր: Ողջունում եմ բոլորիդ և ջերմորեն շնորհավորում ռինդցիներին, արդեն ավանդական դարձած ,,Համայնքի օր ,, տոնակատարության կապակցությամբ: Ձևավորված ավանդույթի համաձայն Վայոց ձորի մարզում հոկտեմբեր ամսին տեղի են ունենում ընթացիկ տարվա ընթացքում ստեղծած բերք ու բարիքի տոնահանդեսներ: Ռինդը մեր մարզում և Հանրապետությունում հայտնի է իր աճեցրած քաղցրահամ մրգերով և արևահամ բանջարեղենով, արտադրած անմահական գինիով ու տարատեսակ պտուղներից ստացած օղու արտադրությամբ: Այսօր մենք ականատես ենք արարող, ստեղծող, քարից հաց քամող ռինդցիների առատաձեռն տաղավարներով բերքի տոնահանդեսին: Եվ սիրով ուզում եմ ասել՝ հալալ է ձեզ ռինդիներ, ձեզ տոնի բարի վայելում: Թող ուրախ տրամադրությունը ձեզ ուղեկցի տարվա և ձեր ողջ կյանքի ընթացքում: Հարգելիներս, մեր երկրի համար ռազմականապես դժվարագույն այս պահին առաջնահերթորեն անամպ երկինք և խաղաղ կեցություն եմ մաղթում բոլորիս: Եվ կարծում եմ արտահայտած պիտի լինեմ նաև ձեր կարծիքն ասելով՝ Աստված պահապան մեր բանակին: Ամենաջերմ բարեմաղթանքներս եմ հղում այն զինվորներին, որոնց ծնորղները ներկա են այս պահին, քանզի նրանք են ապահովում այսօրվա մեր տոնահանդեսը խաղաղությամբ անցկացնելու հնարավորությունը և խաղաղությամբ շարունակելու վաղվա Արենիի գինու փառատոնը ու հաջորդ օրվա եղեգնաձորյան Բերքի տոնը: Հարգարժան գյուղապետ, մարղթում եմ, որ Ձեր գլխավորությամբ Ռինդի արարող ժողովուրդը հասնի առավել մեծ ձեռքբերումների: Սիրելի ռինդցիներ, կրկին շնորհավոր ձեր տոնը, ձեզ առողջություն և բարօրություն, անհոգ ու խաղաղ օրեր: Շնորհավոր տոնդ, Ռինդ:
ՀՀ Վայոց ձորի մարզպետ Հարություն Սարգսյանի ուղերձը Տարեցների միջազգային օրվա կապակցությամբ 01.10.2015
Սիրելի հայրենակիցներ: Սրտանց շնորհավորում եմ բոլորիս Տարեցների միջազգային օրվա կապակցությամբ: Մեծ երջանկություն է ապրել կյանքի փիլիսոփայությամբ հարստացած, իրենց աշխատանքով և արարումով մեզ շահած-պահած, ծերության շրջանին հասած մեր հարազատների կողքին և դասեր առնել նրանց փորձից, ստանալ նրանց օրհնությունը: Սակայն առավել մեծ երջանկություն է նրանց նկատմամբ սեր և հոգատար վերաբերմունք հանդես բերելը, առավել տկարներին խնամելը, ինչպես նրանք են մեզ խնամել, երբ մենք ունեինք դրա կարիքը: Համոզված եմ, որ յուրաքանչյուր ոք հենց նման վերաբերմունք է դրսևորում, որովհետև հայ ազգը դարեր ի վեր ակնածանք է տածել ծերերի նկատմամբ, սիրո ու երախտագիտության դրսևորումներով շրջապատել ավագ սերնդի ներկայացուցիչներին: Կրկին շնորհավորում եմ մարզի ծերունազարդ տատիկներին ու պապիկներին Տարեցների միջազգային օրվա առթիվ: Մաղթում եմ առողջություն և բարօրություն, սեր և հոգածություն:
Հանդիպում ՀՀ Վայոց ձորի մարզպետի մոտ 01.10.2015
Այսօր՝ հոկտեմբերի 1-ին, ՀՀ Վայոց ձորի մարզպետ Հարություն Սարգսյանի մոտ մարզպետի տեղակալներ Սամվել Թարվերդյանի և Մելս Հարությունյանի մասնակցությամբ կայացավ հանդիպում Հայաստանում Եվրոպական միության պատվիրակության խորհրդական Դիրկ Լորենցի հետ: Դիրկ Լորենցի հետ մարզ էին ժամանել նաև Հայաստանում Եվրոպական միության պատվիրակության քաղաքական հարցերի պատասխանատու Անդրեա Խալուպովան, Հայաստանում Եվրոպական միության պատվիրակության մամուլի և տեղեկատվության պատասխանատու Անահիտ Ազատյանը, Հայաստանում Իտալիայի Հանրապետության արտակարգ և լիազոր դեսպան Ջովաննի Ռիչուլլին, Հայաստանում Գերմանիայի Դաշնային Հանրապետության արտակարգ և լիազոր դեսպան Մաթիաս Կիսլերը, Հայաստանում Շվեդիայի Թագավորության գործերի հավատարմատար Մորթեն Էնբերգը, Հայաստանում Մեծ Բրիտանիայի Թագավորության փոխդեսպան Ըմայաս Մորսը: Հանդիպումը կազմակերպվել էր Հայաստանում Եվրոպական միության պատվիրակության խորհրդական Դիրկ Լորենցի կողմից ՀՀ մարզեր ամենամյա այցելության շրջանակում: Մարզպետ Հ. Սարգսյանը շնորհակալություն հայտնեց հյուրերին այցելության և մարզի նկատմամբ ցուցաբերած հետաքրքրության համար: Համառոտ ներկայացրեց Վայոց ձորի տնտեսությունն ու զարգացման հնարավոր ուղիները՝ գյուղատնտեսության, անասնապահության, արդյունաբերության, զբոսաշրջության, ինչպես նաև բուժական զբոսաշրջության բնագավառներում, նշելով Ջերմուկի հանքային ջրի բուժական հատկությունների և ձյունառատ ու մեղմ ձմռան մասին: Հյուրերը հետաքրքրվեցին առանձնապես արտաքին ներդրումների շնորհիվ տնտեսության զարգացման հնարավորությամբ և մարզում քաղաքացիական հասարակության ձևավորման ընթացքով: Նրանք նշեցին, որ իրենց կողմից հայտարարվել է Տարածքային Զարգացման Պիլոտային Ծրագիր ՀՀ մարզերի համար, որում ընդգրկված է նաև Վայոց ձորը: Մարզպետը շնորհակալություն հայտնեց հանդիպման համար, նշեց, որ կարևորում է դրամաշնորհային ծրագրերով տնտեսության զարգացման հնարավորությունները և հավելեց, որ ՀՀ կառավարությունն ու ՀՀ ԳՀ-ն նույնպես ծրագրեր են իրականացնում մարզերում գյուղացիական կոոպերատիվների ձևավորման նպատակով: Հ. Սարգսյանը հույս հայտնեց, որ տնտեսության զարգացման համար նման ծրագրերի իրականացման արդյունքում կհաղթահարվի անկախության տարիներին օբյեկտիվ պատճառներով ստեղծված դժվարությունները: Կողմերը երկուստեք հայտնեցին հետագա համագործակցության պատրաստակամություն: Վերջում հյուրերը դիտեցին Վայոց ձորի տնտեսության ոլորտները ներկայացնող պաստառներ:
