Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Սատարենք մեր բանակին 29.04.2016
Ապրիլի 28-ին Եղեգնաձորի Մշակույթի կենտրոնում տեղի ունեցավ բարեգործական համերգ > խորագրով: Միջոցառմանը մասնակցում էին ՀՀ Վայոց ձորի մարզպետի տեղակալներ Սամվել Թարվերդյանը, Մելս Հարությունյանը, մարզպետարանի աշխատակազմի ստորաբաժանումների ղեկավարներ, ուսումնական հաստատությունների ներկայացուցիչներ, արվեստասեր վայոցձորցիներ: Միջոցառումը նվիրված էր Հայոց ցեղասպանության 101ամյակին, Արցախում զոհված հերոս հայորդիներին: Համերգի սկիզբը տրվեց Տերունական աղոթքով և Արցախում զոհված մարտիկների հիշատակին նվիրված մեկ րոպե լռությամբ: Համերգի ժամանակ ելույթ ունեցան Վայոց ձորի մարզի տարբեր համայնքների բազմաշնորհ և տաղանդավոր երեխաներ և երիտասարդներ, անհատ կատարողներ, պարային խմբեր, երգչախմբեր: Նայելով բեմում ելույթ ունեցող հայորդիներին, զգալով և տեսնելով երեխաների հուզմունքը, հպարտ կեցվածքը և վստահությունը, համոզվում ես, որ ապագան մերն է՝ հայինը, որ վաղվա օրը լինելու է պայծառ ու լուսավոր: Հարկ է նշել, որ բարեգործական համերգի ողջ հասույթը տրվելու է Հայոց բանակին:
Տեղի ունեցավ մշտական գործող հանձնաժողովի հերթական նիստը 29.04.2016
Այսօր՝ ապրիլի 29-ին, տեղի ունեցավ ՀՀ Վայոց ձոր մարզի հողերի օգտագործման ժամանակավոր սխեմաների և դրանց անբաժանելի մասը կազմող հողաշինարարական գործի կազմման աշխատանքները համակարգող, մշտական գործող հանձնաժողովի 2016 թվականի հերթական նիստը: Նիստը նախագահում էր հանձնաժողովի նախագահ, ՀՀ Վայոց ձորի մարզպետ Հարություն Սարգսյանը: Օրակարգում ընդգրկված էր Վայոց ձորի մարզի Մալիշկա, Աղնձաջոր, Թառաթումբ, Ագարակաձոր, Արին, Գնդեվազ և Սարավան գյուղական համայնքնեերի վարչական տարածքների հողերի օգտագործման ժամանակավոր սխեմայում՝ հողերի նպատակային նշանակությունները փոխելու հողաշինական գործը: Նշված հարցը ներկայացրեց մարզպետարանի աշխատակազմի հողաշինության և հողօգտագործման բաժին, մարզային հողային պետական տեսչության պետ, հանձնաժողովի քարտուղար Մեսրոպ Մեսրոպյանը: Հանձնաժողովը քննարկվող հարցի վերաբերյալ ընդունեց համաձայնություն տալու որոշում, համաձայն հանձնաժողովի անդամների հիմնավորման: Նիստին ներկա էին հանձնաժողովի բոլոր անդամները:
Սիրելի հայրենակիցներ, Շնորհավորում եմ ձեզ Աշխատանքի օրվա առթիվ: Հայ ժողովուրդը առանձնահատուկ վերաբերմունք է տածում աշխատանքի և աշխատավոր մարդու նկատմամբ: Դարեր շարունակ հայ ազգը իր քրտնաջան աշխատանքով, արարելու և ստեղծելու մեծագույն վարպետությամբ կերտել և շենացրել է մեր հայրենիքը: Մեզանում աշխատասեր և աշխատող մարդը հարգվում և մեծարվում է: Այս տոնը այն մարդկանց համար է, ովքեր լավ գիտեն աշխատանքի գինը, ովքեր սեփական ձեռքերով են կառուցում իրենց հայրենի տունը՝ սերունդների համար ստեղծելով հզոր հայրենիք և լուսավոր ապագա: Սիրելի հայրենակիցներ, ապրիլյան այս ծանր օրերից հետո գալիս են մայիսյան հաղթական և պայծառ օրեր: Հայ ազգը իր աշխատասիրության և միասնականության շնորհիվ հաղթահարում է իր առջև ծառացած յուրաքանչյուր փորձություն և դժվարություն: Հարգելի աշխատավորներ, մեկ անգամ ևս շնորհավորում եմ մայիսմեկյան այս գեղեցիկ տոնի կապակցությամբ՝ մաղթելով խաղաղություն, բարեկեցիկ կյանք և լիություն՝ հանուն մեր երկրի զարգացման և առաջընթացի:
Հուշ-միջոցառում` <<Ծիածան>> մանկապատանեկան ուսումնական կենտրոնում 29.04.2016
Այսօր ,,Ծիածան,, մանկապատանեկան ուսումնական կենտրոնում տեղի ունեցավ Հայոց ցեղասպանության 101-րդ տարելիցին նվիրված հուշ-միջոցառում: Միջոցառմանը ներկա էին ՀՀ Վայոց ձորի մարզպետի տեղակալ Մելս Հարությունյանը, մարզպետարանի աշխատակազմի ներկայացուցիչներ, ծնողներ և երեխաներ: Միջոցառումը մեկնարկեց Տերունական աղթոքով: Միջոցառման ընթացքում մանուկների շուրթերից հնչում էին հայ ազգի ողբերգալի էջերից մեկի՝ Մեծ եղեռնի մասին պատմող նյութեր, բանաստեղծություններ, ներկայացվեց նաև փոքրիկ բեմադրություն: Մանուկները մեծ խանդավառությամբ միջոցառման մասնակիցներին ներկայացրեցին ազգային պարեր: Ապրիլյան իրադարձությունները մեզ բոլորիս ապացուցեցին, որ հայի գենետիկ կոդում հայրենասիրությունը ամուր արմատներ ունի: Մանկապարտեզից և դպրոցից պետք է սկսվի ռազմահայրենասիրական դաստիարակությունը, որպեսզի մենք ունենք գրագետ, ֆիզիկապես կոփված զինվորներ, սերունդ, որին պետք է թողնենք ազատ, անկախ և հզոր հայրենիք:
Ապրիլը՝ ապրելու, հաղթանակի և պահանջատիրության ամիս 25.04.2016
1915 թվականի ապրիլի 24-ին Օսմանյան կայսրության կողմից հայերի նկատմամբ իրագործվեց մարդկության պատմության մեծագույն և սարսափելի ոճրագործությունը: Այս տարի ապրիլի 24-ին համայն հայությունը նշում է Հայոց ցեղասապանության 101-րդ տարելիցը: Վայոց ձորի մարզում Հայոց ցեղասպանության տարելիցին նվիրված միջոցառումների շարքը մեկնարկեց ապրիլի 23-ին: Այդ օրը մարզի ողջ տարածքում ցեղասպանության անմեղ զոհերի հիշատակին նվիրված ջահեր վառվեցի: Եղեգնաձորում պահանջատիրությանը և Հայոց ցեղասպանության ճանաչմանը նվիրված ջահերթի մասնակիցները, Հայաստանի Հանրապետության դրոշներով, պաստառներով, ՀՀ Վայոց ձորի մարզպետարանի աշխատակազմի կրթության, մշակույթի և սպորտի վարչության գլխավոր մասնագետ Աղասի Հովհաննիսյանի, Վայոց ձորի թեմի փոխառաջնորդ Տ. Զարեհ վարդապետ Կաբաղյանի և Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանի գլխավորությամբ Հայոց ցեղասպանության զոհերի հիշատակը հավերժացնող խաչքարի մոտ իրենց հարգանքի տուրքը մատուցեցին անմեղ նահատակներին: Տերունական աղոթքից հետո հնչեց Հայաստանի Հանրապետության հիմնը, իսկ շարականների ներքո ջահերթի մասնակիցները աղոթեցին անմեղ զոհերի հոգու հանգստության և վառ հիշատակի համար: Ապրիլի 24-ին, վաղ առավոտից չէր դադարում եղեգնաձորցիների հոսքը դեպի հայոց Մեծ եղեռնի զոհերի և Արցախյան պատերազմում զոհված ազատամարտիկների անմար հիշատակին նվիրված հուշահամալիր: ՀՀ Վայոց ձորի մարզային իշխանությունների, ուժային կառույցների ղեկավարների և հոգևոր հայրերի առաջնորդությամբ հուշահամալիրում տեղի ունեցավ ծաղկադրում: Եղեգնաձորի Սբ. Աստվածածին եկեղեցում, Սուրբ Պատարագի ավարտին, հանդիսապետությամբ Վայոց ձորի թեմի առաջնորդ Տ. Աբրահամ արքեպս. Մկրտչյանի, կատարվեց Սրբոց նահատակաց Բարեխոսական կարգը: Միջոցառումների շարքը եզրափակեց > խորագրով ոգեկոչման համերգը, որը նվիրված էր Ցեղասպանության զոհերի հիշատակին, Արցախյան ազատամարտում հաղթանակ նվաճած բոլոր հայորդիներին, զոհվածներին և ողջերին:
Կայացավ գործակարգավարական հերթական խորհրդակցությունը 25.04.2016
Ապրիլի 25-ին ՀՀ Վայոց ձորի մարզպետ Հարություն Սարգսյանի մոտ անցկացվեց գործակարգավարական հերթական խորհրդակցությունը: Խորհրդակցությանը մասնակցում էին մարզպետի տեղակալները, մարզպետի խորհրդականը, մարզպետարանի աշխատակազմի ղեկավարը և ստորաբաժանումների պետերը: Մարզպետի խորհրդական Վ. Ասլանյանը հաղորդեց ապրիլի 18-21-ը Ռուսաստանի Դաշնության Դոնի Ռոստով քաղաքում կայացած > 4-րդ համաժողովի աշխատանքային խմբի աշխատանքների մասին, որի ընթացքում քննարկվել են ՌԴ և ՀՀ մարզերի միջև տնտեսական, մշակութային, հումանիտար, կրթական և մի շարք այլ ոլորտներում համագործակցության ընդլայնման հեռանկարները: Մարզպետ Հ. Սարգսյանը Վ. Ասլանյանին հանձնարարեց հետևել համաժողովի ընթացքում ձեռք բերված պայմանավորվածությունների կատարման ընթացքին: Այնուհետև մարզպետարանի աշխատակազմի ստորաբաժանումների ղեկավարների կողմից ներկայացվեցին ստորաբաժանումների կողմից անցած շաբաթվա ընթացքում իրականացրած և ընթացիկ շաբաթվա ընթացքում կատարվելիք աշխատանքները: Խորհրդակցության ընթացքում մարզպետարանի աշխատակազմի կրթության, մշակույթի և սպորտի վարչության պետի կողմից ներկայացվեցին ,,Լավագույն տնօրեն,, , ,,Լավագույն ուսուցիչ,, և ,,Լավագույն դաստիարակ,, մրցույթների նախապատրաստական աշխատանքները և դպրոցական առարկայական օլիմպիադաների անցկացման ընթացքը: Քաղաքաշինության վարչության պետ Ա. Հովսեփյանը ներկայացրեց դպրոցական շենքների սեյսմիկ անվտանգության միջոցառումների կտարման ընթացքը: Ա. Հովսեփյանին հանձնարարվեց զբաղվել Ջերմուկ քաղաքի ճեմուղու կառուցման աշխատանքներով և շաբաթվա ընթացքում վերսկսկել շինարարական աշխատանքները: Մարզպետ Հ. Սարգսյանը մարզպետարանի աշխատակազմի քարտուղարության պետ Հ. Կարապետյանին հանձնարարեց զբաղվել ՀՀ Նախագահի կողմից՝ 2015 թվականի դեկտեմբերի 4-ին կայացած հանդիպման ընթացքում տրված հանձնարարականների կատարման մասին տեղեկատվության ներկայացման գործով: Խորհրդակցության ավարտին մարզպետ Հ. Սարգսյանը հանձնարարություններ տվեց մարզպետարանի աշխատակազմի ստորաբաժանումների ղեկավարներին, իրենց ղեկավարած ոլորտներում աշխատանքների իրականացման և խնդիրների լուծման ուղղությամբ:
