Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Սեպտեմբերի 1-ի կապակցությամբ ՀՀ Վայոց ձորի մարզպետն այցելել է սաhմանամերձ համայնքների դպրոցներ 01.09.2016
ՀՀ Վայոց ձորի մարզպետ Հարություն Սարգսյանը մարզպետարանի աշխատակազմի կրթության, մշակույթի և սպորտի վարչության պետ Արփիար Ղազարյանի ուղեկցությամբ, սեպտեմբերի 1-ի կապակցությամբ, այցելել է սահմանամերձ Խաչիկ, Խնձորուտ, Բարձրունի, Մարտիրոս և Զառիթափ համայնքների միջնակարգ դպրոցներ: Հ. Սարգսյանը շնորհավորել է աշակերտներին և ուսուցիչներին Գիտելիքի և դպրության օրվա, ինչպես նաև նոր ուսումնական տարվա մեկնարկի կապակցությամբ, հանդիպել է ուսուցչական կոլեկտիվների հետ, ծանոթացել դպրոցներում ուսումնական գործընթացը կազմակերպելու պայմաններին և առկա խնդիրներին: Հ. Սարգսյանը հանդիպումներ է ունեցել նաև նշված համայնքների բնակիչների հետ: Բոլոր համայնքներում ուսումնական տարվա մեկնարկին նվիրված միջոցառումներին ներկա են եղել համայնքների ղեկավարները, որոնք նույնպես ողջունել են տոնական միջոցառումների մասնակիցներին: Հարկ է նշել, որ սեպտեմբերի 1-ի կապակցությամբ > ՓԲԸ Վայոց ձորի ԳԳՄ տնօրինությունը Վայոց ձորի սահմանամերձ բոլոր համայնքների առաջին դասարանի աշակերտներին նվիրել է դպրոցական պայուսակներ և գրենական պիտույքներ: Նշենք, որ մարզպետի տեղակալ Սամվել Թարվերդյանն այցելել է Գետափ համայնքի հիմնական դպրոց: Մարզային ենթակայությամբ գործող հանրակրթական բոլոր հաստատություններում կազմակերպված միջոցառումներին ներկա են եղել մարզային իշխանության ներկայացուցիչներ:
Սիրելի արցախցիներ, Քարորդ դար է անցել այն օրից, երբ Արցախի Հանրապետությունը հռչակվեց անկախ պետություն: Սեպտեմբերի 2-ը համահայկական և համազգային տոն է, քանի որ 25 տարի առաջ միավորվեցին Հայաստանի, Արցախի և Սփյուռքի հայորդիների ուժը՝ ազատ ու անկախ պետություն ունենալու արդար պահանջով: Պայքարեց համայն հայությունը, կռվեց կողք-կողքի և հաղթեց՝ սկիզբ դնելով արցախահայության երազանքի իրագործմանը: Ապրիլ ամսին Արցախի Հանրապետության սահմանին ծավալված դեպքերը ապացուցեցին, որ Արցախ աշխարհը անառիկ է, քանզի նրա ժողովրդի և հողի պաշտպանության համար կանգնած է ողջ հայությունը: Մեր անձնվեր ու հերոս հայորդիները կյանքի ու մահվան պայքար մղեցին՝ պաշտպանելով իրենց հայրենակիցների օջախները: Սիրելի հայրենակիցներ, Սեպտեմբեր ամիսը հայ ժողովրդի համար յուրօրինակ արժեք ունի: Օրեր անց մենք տոնելու ենք Հայաստանի Հանրապետության անկախության հռչակման 25-րդ տարեդարձը: Պատահական չէ, որ մեր անկախ ու ազատ պետությունների կարևորագույն տոները նշվում են միևնույն ժամանակ: Սա ևս մեկ ապացույց է, որ 1991 թվակականին ծավալված համահայկական, համազգային պայքարի գաղափարներն ու նպատակները արդար են ու ճշմարիտ: Սիրելի արցախցիներ, Կրկին շնորհավորում եմ այս կարևորագույն պետական տոնի կապակցությամբ՝ մեջբերելով Գարեգին Նժդեհի խոսքերը. ,,Ուժեղինն է աշխարհը, հայրենիքը, ազատությունը և ամեն ինչ,,: Արցախ աշխարհին ցանկանում եմ ուժ, կորով, խաղաղություն և բարեկեցություն:
ՀՀ Վայոց ձորի մարզպետ Հարություն Սարգսյանի ուղերձը սեպտեմբերի 1-ի կապակցությամբ 31.08.2016
Սիրելի դպրոցականներ, ուսանողներ, մանկավարժներ, ծնողներ, կրթության բնագավառի ներկայացուցիչներ, Շնորհավորում եմ նոր ուսումնական տարվա՝ Գիտելիքի և դպրության օրվա կապակցությամբ: Դպրոցական տարիները յուրաքանչյուր մարդու կյանքում ամենաբարի ու ամենահիշարժանն են: Աշխարհում չկա ավելի հրաշալի բան, քան սովորելը, կարդալը ու նոր հորիզոններ բացահայտելը: Գիտելիքը մարդուն դարձնում է ավելի ուժեղ, իմաստուն և ավելի բարի: Ճանապարհը դեպի գիտելիք և կրթություն դժվարին է, պետք է զինվել համբերությամբ և ջանքեր գործադրել՝ ցանկալի արդյունքի հասնելու և ցանված սերմերի քաղցր բերքը հավաքելու համար: Շնորհավորելով նոր ուսումնական տարվա մեկնարկի կապակցությամբ, իմ երախտիքի խոսքն եմ հղում մեր ուսուցիչներին: Ձեզ է վստահված մեր սերունդների հայեցի դաստիարակության հայրենանվեր ու դժվարին գործը: Դուք ձեր սաներին օգնում եք բացել գիտության գաղտնի դռները, բացահայտում հայ ազգի ապագա հանճարներին՝ նրանց մեջ սերմանելով սերն ու նվիրվածությունը հայրենիքի նկատմամբ ու դաստիարակելով Հայաստանի Հանրապետության արժանի քաղաքացիներ: Մաղթում եմ ձեզ հաջողություններ, սիրելի մանկավարժներ, ձեր շնորհակալ և պատվաբեր աշխատանքում: Առանձնահատուկ ջերմությամբ ցանկանում եմ շնորհավորել առաջին անգամ դպրոց ոտք դրած մեր փոքրիկներին: Թող դպրոցական աշխարհը լեցուն լինի անհոգ ու լուսավոր ապրումներով, բազում հետաքրքիր ու գեղեցիկ ակնթարթներով: Ցանկանում եմ, որ ուսումնառության այս տարիները ձեզ համար լինեն ամենահիշարժանը, որպեսզի դպրոցը դառնա սովորելու և նոր գիտելիքներ ձեռք բերելու հիմնարար սյուն: Սիրելի աշակերտներ, հարգելի մանկավարժներ, Կրկին շնորհավորում եմ Գիտելիքի և դպրության տոնի կապակցությամբ: Ցանկանում եմ բեղմնավոր և արդյունավետ ուսումնական տարի, նոր ու հետաքրքիր բացահայտումներ ու գերազանց գնահատականներ: Բարի երթ:
Տեղի ունեցավ գործակարգավարական հերթական խորհրդակցությունը 29.08.2016
Այսօր ՀՀ Վայոց ձորի մարզպետ Հարություն Սարգսյանը մարզպետի տեղակալի, մարզպետի խորհրդականի, մարզպետարանի աշխատակազմի ղեկավարի և մարզպետարանի աշխատակազմի ստորաբաժանումների պետերի մասնակցությամբ անցկացրեց հերթական գործակարգավարական խորհրդակցությունը: Ստորաբաժանումների ղեկավարները ներկայացրեցին նախորդ խորհրդակցությանն արձանագրված հանձնարարականների կատարման ընթացքը, անցած շաբաթվա ընթացքում կատարած աշխատանքները և ընթացիկ շաբաթում իրականացվելիք ծրագրերը: Քաղաքաշինության վարչության պետ Ա. Հովսեփյանը ներկայացրեց Ջերմուկի ճեմուղու կառուցման շինարարական աշխատանքների ընթացքը: Խորհրդակցությանը քննարկվեցին բերքահավաքին, մարզի անապահով գյուղացիական տնտեսություններում իրականացվող անասնաբուժական միջոցառումներին վերաբերող հարցեր: Մարզպետարանի աշխատակազմի կրթության, մշակույթի և սպորտի վարչության պետ Ա. Ղազարյանը զեկուցեց, որ մարզի բոլոր դպրոցները պատրաստ են նոր ուսումնական տարվա մեկնարկին և տեղեկացրեց, որ մարզպետարանի պաշտոնյաները սեպտեմբերի 1-ին կայցելեն հանրակրթական հաստատություններ` մասնակցելու Գիտելիքի և դպրության տոնին նվիրված միջոցառումներին: Մարզի ղեկավարը ստորաբաժանումների ղեկավարներին տվեց համապատասխան հանձնարարականներ՝ ուղղված ոլորտային խնդիրների լուծմանը:
Այսօր տեղի ունեցավ ՀՀ Վայոց ձորի մարզի հանրակրթական հաստատությունների ղեկավարների օգոստոսյան ամենամյա խորհրդակցությունը, որը վարում էր ՀՀ Վայոց ձորի մարզպետ Հարություն Սարգսյանը: Խորհրդակցությանը մասնակցում էին ՀՀ ԿԳ նախարարի տեղակալ Մկրտիչ Մանուկյանը, մարզպետի տեղակալները, մարզպետարանի աշխատակազմի ղեկավարը, կառուցվածքային ստորաբաժանումների ղեկավարներ, մարզի կրթական հաստատությունների տնօրենները, փոխտնօրենները: Բացման խոսքով հանդես եկավ մարզպետ Հ. Սարգսյանը: Մարզպետը շնորհավորեց ներկաներին նոր ուսումնական տարվա մեկնարկի կապակցությամբ՝ մաղթելով արդյունավետ ուսումնական տարի:
ՀՀ Վայոց ձորի մարզպետարանի աշխատակազմը, ՀՀ վայոց ձորի մարզպետ Հարություն Սարգսյանի գլխավորությամբ, վաստակած հանգստի ուղարկեց Առողջապահության և սոցիալական ապահովության վարչություն պետի տեղակալ Սամվել Շահբազյանին: Մարզպետ Հ. Սարգսյանը շնորհակալություն հայտնեց Ս. Շահբազյանին իր վաստակի, մասնագիտական և մարդկային բարձր որակների համար՝ ցանկանալով հետագա հաջողություններ և հանգիստը վայելելու առողջ ու խաղաղ պայմաններ: Ս. Շահբազյանին բարեմաղթանքներ և շնորհակալանքի խոսքեր հղեցին մարզպետի տեղակալները, աշխատակազմի ղեկավարը և գործընկերները: Ծառայողական պարտականությունները գերազանց կատարելու համար Ս. Շահբազյանը մարզպետ Հ. Սարգսյանի կողմից արժանացավ պատվոգրի:
