Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Զորահանդես Եղեգնաձորում 13.07.2014
2014 թվականի հուլիսի 12-ին Եղեգնաձոր քաղաքում հանդիսավորությամբ նշվել է ՀՀ պաշտպանության նախարարության 4-րդ բանակային կորպուսի կազմավորման 17-րդ տարեդարձը: Այդ կապակցությամբ Եղեգնաձոր քաղաքում անցկացված զորահանդեսին ներկա են եղել ՀՀ պաշտպանության նախարար Սեյրան Օհանյանը, ՀՀ ԶՈւ ԳՇ պետ, գեներալ-գնդապետ Յուրի Խաչատուրովը, ՀՀ Վայոց ձորի մարզպետ Էդգար Ղազարյանը, ՀՀ Սյունիքի մարզպետ Վահե Հակոբյանը, ՀՀ պաշտպանության փոխնախարար Արա Նազարյանը, ՀՀ սպորտի և երիտասարդության հարցերի փոխնախարար Խաչիկ Ասրյանը, ՀՀ ԶՈՒ ԳՇ պետի տեղակալները, զորամիավորումների հրամանատարներ, ՊՆ, ԶՈւ, ԶՈւ ԳՇ վարչությունների պետեր, ազատամարտիկներ, պետական այրեր: Հանդիսավոր միջոցառման բացման խոսքով հանդես է եկել ՀՀ ՊՆ 4-րդ բանակային կորպուսի հրամանատար, գեներալ-մայոր Անդրանիկ Մակարյանը: Ներկայացնելով զորամիավորման կազմավորման ճանապարհը, անցած ուղին և ձեռքբերումները` Անդրանիկ Մակարյանը մասնավորապես նշել է, որ զորամիավորման անձնակազմը մեծ պատասխանատվությամբ ու գիտակցումով է իրականացնում հայրենիքի սահմանները անվտանգ պահելու դժվարին, բայց պատվաբեր գործը և մշտապես անում է առավելագույնը մարտական պատրաստության բարձր ցուցանիշներ արձանագրելու համար: Շնորհավորելով ներկաներին 4-րդ բանակային զորամիավորման կազմավորման 17-րդ տարեդարձի կապակցությամբ` ՀՀ պաշտպանության նախարար Սեյրան Օհանյանն իր խոսքում ընդգծել է, որ տոնական օրը Վայոց ձորի մարզկենտրոնում մեծ հանդիսությամբ նշելը բնավ պատահական չէ, քանի որ ժողովրդի ծոցից ծնունդ առած և նրա անվտանգության երաշխավորը հանդիսացող ազգային բանակն իր ժողովրդի հետ պետք է դիմավորի բանակային յուրաքանչյուր տոն: Պաշտպանական գերատեսչության ղեկավարը հավելել է նաև, որ զորամիավորման կազմավորման տարեդարձը ևս մեկ պատեհ առիթ է հետադարձ հայացք նետելու և իրավամբ հպարտանալու զորամիավորման անցած ճանապարհով: Անդրադառնալով Հայոց բանակի մարտունակությունը և Ադրբեջանի կողմից մշտապես հնչող ռազամատենչ հայտարարություններին և հակառակորդի ագրեսիվ գործողություններին` պաշտպանության նախարարը վստահեցրել է, որ ինչպես Արցախյան գոյամարտի տարիներին, այնպես էլ այսօր հայ զինվորն առանց երկնչելու և պատվով է կատարում իր առջև դրված ցանկացած մարտական խնդիր` զսպող մեխանիզմների միջոցով կանխելով հակառակորդի դիվերսիոն հետախուզական խմբերի անհաջող գործողությունները: Շնորհավորական ելույթներով հանդե են եկել նաև ՀՀ Վայոց ձորի մարզպետ Էդգար Ղազարյանը, ՀՀ սպորտի և երիտասարդության հարցերի նախարարի տեղակալ Խաչիկ Ասրյանը և Վայոց ձորի թեմի առաջնորդ Աբրահամ Արքեպիսկոպոս Մկրտչյանը: Միջոցառման ընթացքում տեղի է ունեցել նաև պարգևատրման արարողություն: Զորամիավորման մի շարք զինծառայողներ, պահեստազորի սպաներ մարտական պատրաստության բարձր ցուցանիշների, բարեխիղճ ծառայության և օրինակելի զինվորական կարգապահության համար պարգևատրվել են մեդալներով, պատվոգրերով և արժեքավոր նվերներով: Որպես քրտնաջան աշխատանքի արդյունք` պաշտպանության նախարար Սեյրան Օհանյանը զորամիավորման հրամանատարությանն է հանձնել զորամիավորման մարտական դրոշը: Հանդիսավոր միջոցառումը եզրափակվել է զորամիավորման ստորաբաժանումների զորահանդեսով:
ՀՀ Վայոց ձորի մարզի համայնքների ղեկավարները հանդես են գալիս հանրային հաշվետվությամբ 11.07.2014
2014 թվականի հուլիսի 7-ին մեկնարկել է ՀՀ Վայոց ձորի մարզի համայնքների ղեկավարների գործունեության կիսամյակային արդյունքների մասին հանրային հաշվետվություն ներկայացնելու գործընթացը: Հունիսի 7-ին հանրային հաշվետվությամբ հանդես են եկել Գնդեվազ և Ագարակաձոր, հունիսի 8-ին՝ Մալիշկա, Աղավնաձոր, Արփի և Գետափ, հունիսի 9-ին՝ Գլաձոր, Վերնաշեն, Քարագլուխ և Կարմրաշեն, հունիսի 10-ին՝ Աղնջաձոր, հունիսի 11-ին՝ Խաչիկ և Չիվա համայնքների ղեկավարները: Գալիք շաբաթ համայնքների ղեկավարները հանրային հաշվետվությամբ հանդես կգան ներքոնշյալ ժամանակցույցով. հունիսի 14-ին՝ Ելփին, Զառիթափ և Ռինդ, հունիսի 15-ին՝ Մարտիրոս, Սերս, Բարձրունի, հունիսի 16-ին՝ Արտաբույնք, Հորբատեղ, Ազատեկ, հունիսի 17-ին՝ Փոռ, Արտավան, Սարավան, հունիսի 18-ին՝ Արին, Զեդեա, Հերհեր համայնքեր: Լրացուցիչ տեղեկությունների համար կարող եք զանգահարել ՀՀ Վայոց ձորի մարզպետարանի աշխատակազմի ՏԻ և ՀԳՄ հարցերի վարչություն (+374.281) 2.30.61 հեռախոսահամարով:
ՀՀ Վայոց ձորի մարզպետը հանդիպում ունեցավ Եվրամիության ծրագրերի պատասխանատուների հետ 11.07.2014
2014 թվականի հուլիսի 10-ին ՀՀ Վայոց ձորի մարզպետ Էդգար Ղազարյանը հանդիպում ունեցավ Եվրամիության ECORYS կազմակերպության տեխնիկական աջակցության թիմի պատասխանատուների հետ, որոնք ՀՀ տարածքային կառավարման նախարարության հետ համատեղ իրականացնում են “Support to the EU Delegation to Armenia and RA Ministry of Territorial Administration for preparation of actions in regional development” ծրագիրը: Ծրագրով նախատեսված է ՀՀ բոլոր մարզերում իրականացնել զարգացման գրանտային ծրագրեր՝ յուրաքանչյուր ծրագիրը նվազագույնը 500.000 եվրո ծավալով: Մարզպետի հետ հանդիպումից հետո ծրագրի պատասխանատուները մարզպետարանի դահլիճում հանդիպում ունեցան մարզի հասարակական կազմակերպությունների և մասնավոր հատվածի ներկայացուցիչների հետ՝ ներկայացնելով ծրագրին դիմելու կարգն ու պայմանները:
Քննարկվեցին Ջերմուկ քաղաքի զարգացմանն ուղղված ներդրումային ծրագրեր 11.07.2014
2014 թվականի հուլիսի 10-ին ՀՀ Վայոց ձորի մարզպետ Էդգար Ղազարյանն աշխատանքային հանդիպում ունեցավ Ասիական զարգացման բանկի խորհրդատուներ Յորգ Ֆիշերի և Սամվել Բարեյանի հետ: Հանդիպման ընթացքում քննարկվեցին Ասիական զարգացման բանկի կողմից Ջերմուկ քաղաքում իրականացվելիք ներդրումային ծրագրերի հնարավորությունները և ուղղությունները: Ասիական զարգացման բանկը ՀՀ կառավարության հետ ձեռք բերված համաձայնության շրջանակներում պատրաստակամություն է ցուցաբերել ներդումներ կատարել Ջերմուկ քաղաքի ենթակառուցվածնքների զարգացման ծրագրերում: ՀՀ Վայոց ձորի մարզպետի կողմից ներկայացվեցին ներդրումային գրավչություն ունեցող մի շարք նախագծեր, որոնք բխում են Շվեյցարական փորձագիտական ուսումնասիրությունների հիման վրա մշակված Ջերմուկ քաղաքի զարգացման ռազմավարական ծրագրից: Պայմանավորվածություն ձեռք բերվեց, այդ ծրագրերի նախնական քննարկում կազմակերպել Ջերմուկի բնակչության ակտիվ խմբերի և մասնավոր հատված ներկայացուցիչների հետ, որից հետո դրանք ներկայացնել բանկի պատասխանատուների քննարկմանը:
Դիպլոմների հանձնման հանդիսավոր արարողություն ՀՊՏՀ Եղեգնաձորի մասնաճյուղում 11.07.2014
2014 թվականի հուլիսի 11-ին Հայաստանի պետական տնտեսագիտական համալսարանի Եղեգնաձորի մասնաճյուղում տեղի ունեցավ 2013-2014 թվականների ոսումնական տարվա բակալավրիատի և մագիստրատուրայի շրջանավարտների դիպլոմների հանձնման հանդիսավոր արարողություն, որին մասնակցում էին ՀՀ Վայոց ձորի մարզպետ, ՀՊՏՀ Եղեգնաձորի մասնաճյուղի դասախոս, տնտեսագիտության թեկնածու, դոցենտ Էդգար Ղազարյանը, ՀՊՏՀ ուսումնակազմակերպական աշխատանքների գծով պրոռեկտոր, տնտեսագիտության թեկնածու, պրոֆեսոր Միհրդատ Հարությունյանը, ՀՊՏՀ Եղեգնաձորի մասնաճյուղի տնօրեն, տնտեսագիտության թեկնածու, դոցենտ Սոս Խաչիկյանը, ՀՊՏՀ կառավարման ֆակուլտետի դեկանի տեղակալ, տնտեսագիտության թեկնածու, դոցենտ Վարդան Վլասյանը, ՀՊՏՀ միջազգային տնտեսական հարաբերությունների ամբիոնի վարիչ, տնտեսագիտության թեկնածու, դոցենտ Գրիգոր Նազարյանը, ՀՊՏՀ Եղեգնաձորի մասնաճյուղի տնօրենի տեղակալ, տնտեսագիտության թեկնածու Արփինե Հովակիմյանը: Հատկանշական է, որ ՀՊՏՀ Եղեգնաձորի մասնաճյուղն այս տարի ավարտեցին առաջին մագիստրոսները, ինչը կարևոր իրադարձություն է մասնաճյուղի տարեգրության մեջ: Շրջանավարտներին ուղղված շնորհավորական խոսքում Է.Ղազարյանը մաղթեց նրանց նորանոր հաջողություններ և ձեռքբերումներ՝ նշելով, որ այս պահից իրենք բոլորն ունեն հավասար կարգավիճակ՝ իբրև Հայաստանի պետական տնտեսագիտական համալսարանի շրջանավարտներ: Է.Ղազարյանը ցանկացավ, որ շրջանավարտներն իրենց հետագա աշխատանքում ազնվությամբ, աշխատասիրությամբ, նվիրումով, պատասխանատվությամբ և գիտելիքներով բարձր պահեն ՀՊՏՀ շրջանավարտի բարի համբավը, իսկ այսօրվա ստացած դիպլոմները երաշխիք լինեն արժանապատիվ աշխատանքի և անձնական բարեկեցության: Արարողության ավարտին բոլոր շրջանավարտներին հանձնվեցին Հայաստանի պետական տնտեսագիտական համասլարանի դիպլոմները:
Աշխատանքային այցելություն Հերհեր և Կարմրաշեն համայնքներ 10.07.2014
2014 թվականի հուլիսի 9-ին ՀՀ Վայոց ձորի մարզպետ Էդգար Ղազարյանը, մարզպետի տեղակալ Սամվել Թարվերդյանի և մարզպետարանի աշխատակազմի տրանսպորտի և ճանապարհաշինության բաժնի պետ Խաչիկ Ասլանյանի ուղեկցությամբ աշխատանքային այցելություն է կատարել Հերհեր և Կարմրաշեն համայնքներ: Մի քանի ամիս առաջ այդ համայնքների բնակիչները բարձրացրել էին իրենց համայնքների ճանապարհի հիմնանորոգման հարցը: Խնդիրը քննարկվել էր նաև ՀՀ Նախագահ Սերժ Սարգսյանի նախընտրական հանդիպումների ընթացքում: Հերհեր կատարած այցի ընթացքում մարզպետը խոստացել էր միջոցներ ձեռնարկել ճանապարհի հիմնանորոգման ուղղությամբ: Տրված խոստումը կատարվեց կարճ ժամանակահատվածում: 2014 թվականին ՀՀ պետական բյուջեից ՀՀ Վայոց ձորի մարզպետարանին հատկացված միջոցների շրջանակներում շուրջ 80 մլն դրամ գումար է նախատեսվել Երևան-Մեղրի միջպետական ավտոճանապարհից դեպի Հերհեր և Կարմրաշեն տանող ճանապարհի հիմնանորոգման նպատակով: Ճանապարհաշինական աշխատանքները կմեկնարկեն 2014 թվականի հուլիսի կեսից և կավարտվեն մինչև հոկտեմբերի վերջը: Կարմրաշեն համայնքում մարզպետը մասնակցել է նաև համայնքի ղեկավարի գործունեության կիսամյակային արդյունքների հանրային հաշվետվությանը, որի շրջանակներում համայնքի բնակիչներին տեղեկատվություն է ներկայացրել ՀՀ կառավարության կողմից համայնքներում, այդ թվում Կարմրաշեն համայնքում իրականացվող ծրագրերի մասին, պատասխանել է համայնքի բնակիչներին հուզող հարցերին:
