Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Այցելություններ դպրոցներ 02.09.2013
Վայոց ձորի 50 դպրոցներում՝ 47 մարզային ենթակայությամբ գործող հիմնական և միջնակարգ, ինչպես նաև ՀՀ ԿԳ ենթակայությամբ գործող 3 ավագ դպրոցներում ղողանջեց առաջին զանգը` իր հետ բերելով նոր հույզեր ու հույսեր, բազում ցանկություններ ու նպատակներ, իղձեր ու երազանքներ: Գիտելիքի և դպրության օրվա առիթով ՀՀ Վայոց ձորի մարզպետ Էդգար Ղազարյանը ՀՀ Վայոց ձորի մարզպետարանի աշխատակազմի կրթության, մշակույթի, սպորտի և երիտասարդության հարցերի վարչության պետ Արփիար Ղազարյանի ուղեկցությամբ այցելել է ՀՀ Վայոց ձորի մարզի մի շարք հանրակրթական դպրոցներ: Աշակերտներին, ուսուցիչներին և ծնողներին շնորհավորելու նպատակով Է.Ղազարյանն այցելել է Վայքի հիմնական դպրոց, որտեղ քաղաքապետ Հարություն Սարգսյանի հետ մասնակցել է դպրոցի բակում կազմակերպված հանդիսավոր միջոցառմանը: Այցելության հաջորդ կանգառը Զառիթափի միջնակարգ դպրոցն էր: Զառիթափի դպրոցի տնօրեն Խաժակ Դավթյանը տոնական միջոցառման շրջանակներում պայուսակներ նվիրեց բոլոր առաջին դասարանցիներին: Է.Ղազարյանն այցելեց նաև Վայոց ձորի սահմանամերձ Մարտիրոս, Բարձրունի և Սերս գյուղերի հանրակրթական դպրոցներ, որտեղ աշակերտներին և ուսուցիչներին շնորհավորելուց բացի համայնքների ղեկավարներ Կամո Մկրտչյանի, Գագիկ Գևորգյանի և Տիգրան Մալխասյանի, ինչպես նաև դպրոցների տնօրենների հետ շրջայց կատարեց դպրոցների տարածքում, ծանոթացավ ուսումնական մասնաշենքների պայմաններին և նոր ուսումնական տարվա մեկնարկի կապակցությամբ իրականացված նախապատրաստական աշխատանքների արդյունքներին: Սահմանամերձ Բարձրունի գյուղի միջնակարգ դպրոցում անցյալ տարի առաջին դասարանցիներ չէին եղել, իսկ այս տարի դպրոց են հաճախել հինգ երեխաներ: Նույն օրը Է.Ղազարյանն այցելեց նաև Վայքի Ավագ դպրոց, որտեղ հանդիպում ունեցավ դպրոցի ուսուցիչների հետ` շնորհավորելով նրանց նոր ուսումնական տարվա մեկնարկի կապակցությամբ:
<<Տուրիզմ-Վայոց ձոր>> խորագրով ֆորում-քննարկում Վայոց ձորում 02.09.2013
Ս/թ օգոստոսի 30-ին Վայոց ձորի մարզի Հեմոն համայնքում գտնվող Լուսի Տուր հյուրանոցային համալիրում մասնակցությամբ՝ ՀՀ Վայոց ձորի մարզպետի տեղակալ Արամ Գրիգորյանի և Հայ Առաքելական Սուրբ եկեղեցու Վայոց ձորի թեմի առաջնորդ Աբրահամ եպիսկոպոս Մկրտչյանի, > ծրագրի շրջանակում տեղի ունեցավ > խորագրով ֆորում-քննարկում: Քննարկմանը մասնակցում էին ՀԿ-ների, ֆինանսավորող կազմակերպության, տարածաշրջանում զբոսաշրջության զարգացման կենտրոնների, գործընկեր կառույցների, ինչպես նաև տուրիստական գործակալությունների ներկայացուցիչներ: Ողջույնի խոսքով հանդես ՀՀ Վայոց ձորի մարզպետի տեղակալ Արամ Գրիգորյանը, ով կարևորեց տեղական զբոսավարների վերապատրաստման դասընթացը և երիտասարդության շրջանում տուրիզմի զարգացման նկատմամբ եղած հետաքրքրությունը: Ֆորումի ընթացքում քննարկեց մարզում զբոսաշրջության զարգացման հեռանկարները: Ներկայացվեց 2013թ-ի ապրիլի 1-ից > ՀԿ-ում մեկնարկած հնգամսյա > ծրագիրը, որը ֆինանսավորվել է ԱՄՆ ՄԶԳ (USAID) Ձեռնարկությունների զարգացման և շուկայի մրցունակության ( EDMC ) ծրագրի կողմից: Ծրագրի ընթացքում Վայոց ձորի մարզից 15 երիտասարդներ վերապատրաստվել են որպես զբոսավարներ: Դասընթացի երեքամսյա տեսական դասընթացից հետո սկսվել է երկամսյա գործնական փուլը, որի ընթացքում մասնակիցները պրոֆեսիոնալ զբոսավարների ուղեկցությամբ այցելել են Վայոց ձորի և Սյունիքի մարզերում գտնվող պատմամշակութային կոթողներ՝ զբոսավարության գործնական աշխատանքներ իրականացնելու: Ծրագրի ներկայացումից հետո մասնակիցները քննարկեցին տարածաշրջանում տուրիզմի զարգացման հեռանկարները, որի ենթացքում ոլորտի զարգացման վերաբերյալ մի շարք առաջարկություններ արվեցին մարզային և տեղական ինքնակառավարման մարմինների, Վայոց ձորի թեմի առաջնորդի, ինչպես նաև տուրիստական կազմակերպությունների, կրթական ու մշակութային հաստատությունների կողմից: Հանդիպման ավարտին վերապատրաստված զբոսավարներին հանձնվեցին հավաստագրեր:
ՀՀ Վայոց ձորի մարզպետ Էդգար Ղազարյանի ուղերձը՝ Գիտելիքի և դպրության օրվա կապակցությամբ 01.09.2013
Սիրելի աշակերտներ, մանկավարժներ, ուսանողներ, դասախոսներ, կրթության բնագավառի ներկայացուցիչներ և ծնողներ: Շնորհավորում եմ Ձեզ Գիտելիքի և դպրության օրվա կապակցությամբ: Հայ ազգը հազարամյա իր պատմության ընթացքում միշտ էլ առանձնահատուկ հոգածություն է դրսևորել դպրոցի և հոգատար վերաբերմունք՝ ուսուցչի հանդեպ։ Իսկ դպրության, գիր-գրականության և որակյալ կրթության հանդեպ սերը մեր ժողովրդի մեջ փոխանցվում է սերնդեսերունդ: Բոլոր ժամանակներում գիտելիքն ու կրթությունն ամենաթանկ ու անփոխարինելի կապիտալն է ու հասարակության զարգացման շարժիչ ուժը։ Եթե հասարակությունը կրթված է, ապա երկրի վաղվա օրը կանխատեսելի է և երաշխավորված։ Հարգելի մանկավարժներ և դասախոսներ, համոզված եմ, որ Դուք անելու եք ամեն ինչ՝ Ձեր սաների հոգում վեհ ազգային ու համամարդկային գաղափարներ սերմանելու համար: Սիրելի դպրոցականներ և ուսանողներ, հավատում եմ, որ Ձեր գիտելիքներն ի նպաստ եք բերելու Հայաստանի Հանրապետության զարգացման ու հզորացման գործին: Այսօրն առանձնահատուկ խորհուրդ և նշանակություն ունի առաջին դասարանցիների համար, որոնք իրենց հարազատների ուղեկցությամբ գնում են դպրոց և դպրոցի խորհրդանշական դռներից մուտք գործում գիտելիքի և իմաստնության անսահման գանձարան: Մաղթում եմ, որ այդ գանձարանի հարստությունը պարուրի նրանց ողջ կյանքում` բացելով նրանց առջև հաջողակ կյանքի նոր հորիզոններ: Սեպտեմբերի 1-ով մեկնարկում է նաև նոր ուսումնական տարին: Մաղթում եմ, որ այն հաջողությունների տարի լինի ուսումնական գործընթացի բոլոր մասնակիցների համար: Մեր իրավասությունների շրջանակում մենք անելու ենք հնարավոր առավելագույնը ուսումնական գործընթացը հավուր պատշաճի կազմակերպելու համար և մեր մեծ ցանկությունն է դրա դիմաց տեսնել ուսման հանդեպ սիրով լի աշակերտներ և իրենց գործին նվիրված ուսուցիչներ: Կրկին անգամ շնորհավորում եմ մեզ բոլորիս Գիտելիքի և դպրության օրվա, ինչպես նաև նոր ուսումնական տարվա մեկնարկի առիթով: Բարի երթ նոր ուսումնական տարում:
Օգոստոսի 27-ին ՀՀ Վայոց ձորի մարզպետ Էդգար Ղազարյանի մասնակցությամբ Հայաստանի երիտասարդական հիմնադրամի Վայոց ձորի մարզային կենտրոնում տեղի ունեցավ բատիկայի աշխատանքների ցուցահանդեսի բացումը: Ցուցահանդեսին ներկա էին հյուրեր Վայոց ձորի մարզպետարանից, Եղեգնաձորի քաղաքապետարանից, մարզում գործող տարբեր հասարակական կազմակերպություններից, Հայաստանի երիտասարդական հիմնադրամից, ինչպես նաև կենտրոնի կամավորներ:
Հանդիպում Աղավնաձոր համայնքի բնակիչների հետ 29.08.2013
ՀՀ Վայոց ձորի մարզպետ Էդգար Ղազարյանը ՀՀ Վայոց ձորի մարզպետի տեղակալ Սամվել Թարվերդյանի ուղեկցությամբ այցելություն է ունեցել Աղավնաձոր համայնք` քննարկելու 2013 թվականի խաղողի մթերումների կազմակերպման հետ կապված խնդիրներ: Մարզպետի կողմից այգետերերին ներկայացվեց տեղեկատվություն ՀՀ գյուղատնտեսության նախարարության և ՀՀ Վայոց ձորի մարզպետարանի կողմից խաղողի մթերումների կազմակերպման ուղղությամբ կատարված աշխատանքների, մթերող կազմակերպությունների հետ ձեռք բերված պայմանավորվածությունների, ինչպես նաև մթերումների հավանական ծավալների և մոտավոր գների վերաբերյալ: Հանդիպման ընթացքում համայնքի բնակիչները ներկայացրին մթերումների հետ կապված իրենց անհանգստություններն ու առաջարկությունները:
Կայացավ Արենիի համայնքային կայքի բացման շնորհանդեսը 27.08.2013
Ս/թ օգոստոսի 26-ին Վայոց ձորի մարզի Արենի համայնքի մշակույթի տան դահլիճում կայացավ Արենիի համայնքային կայքի և “ԱՐՓԱ” երիտասարդկան ամսաթերթի շնորհանդեսը: Միջոցառմանը մասնակցում էին Վայոց ձորի մարզպետի տեղակալ Արամ Գրիգորյանը, համայնքի ղեկավար Սերյոժա Սուքիասյանը, համայքնի ավագանու անդամները և բնակիչներ: Այս նախաձեռնության հեղինակը Արենիի համայնքային երիտասարդական նախաձեռնությունների ակումբն էր` ՀԵՆԱ-ն, իսկ աջակիցը` Քաունթրփարթ ինթերնեշնլ հայաստանյան ներկայացուցչությունը` ԱՄՆ ՄԶԳ ֆինանսավորմամբ: Ակումբի անդամ Արևիկ Հայրապետյանը ներկայացրեց ՀԵՆԱ երկամյա գործունեությունը, իսկ Նորայր Գրիգորյանը` համայնքային կայքն իր աշխատանքային բոլոր բաժիններով: Կայքի գործարկման և համայնքային թերթի հրատարակման կապակցությամբ շնորհավորանքի խոսքեր ասացին համայնքի ղեկավար Սերյոժա Սուքիասյանը, Վայոց ձորի մարզպետի տեղակալ Արամ Գրիգորյանը, Քաունթրփարթի “Քաղաքացիական հասարակության և տեղական ինքնակառավարման աջակցության ծրագրի” Վայոց ձորի մարզային հակարգող Ռուզան Ղազարյանը: Վերջում համերգային ծրագրով ելույթ ունեցան համայնքի մշակույթի տան մանկական երգչախումբը և ազգագրական պարերի համույթը, որոնց բեմական հագուստները ևս ձեռք են բերվել Համայքային երիտասարդական նախաձեռնությունների ակումբի իրականացրած ծրագրերով:
