Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ ԱԻ նախարարի աշխատանքային այցելությունը Վայոց ձոր 06.11.2013
2013 թվականի նոյեմբերի 5-ին ՀՀ արտակարգ իրավիճակների նախարար Արմեն Երիցյանը նախարարության բարձրաստիճան պաշտոնյաների ուղեկցությամբ աշխատանքային այցելություն էր կատարել ՀՀ Վայոց ձորի մարզ: ՀՀ Վայոց ձորի մարզպետ Էդգար Ղազարյանի հետ մարզպետարանում տեղի ունեցած հանդիպման ժամանակ քննարկվեցին ՀՀ արտակարգ իրավիճակների նախարարության մարզային ստորաբաժանումների գործունեության, նրանց ծառայությանն առնչվող հարցեր: Այնուհետև ՀՀ արտակարգ իրավիճակների նախարարն ու ՀՀ Վայոց ձորի մարզպետն այցելեցին ՀՀ արտակարգ իրավիճակների նախարարության Վայոց ձորի փրկարարական ծառայություն` առկա խնդիրներին տեղում ծանոթանալու նպատակով: ՀՀ արտակարգ իրավիճակների նախարարությունը պլանավորում է առաջիկայում ՀՀ մարզերում, այդ թվում ՀՀ Վայոց ձորի մարզում հիմնել ճգնաժամային կառավարման կենտրոն` հագեցած ժամանակակից տեխնիկայով և սարքավորումներով:
Էդգար Ղազարյանի դասախոսությունը Քաղաքական դասընթանցերի դպրոցում 04.11.2013
Ջերմուկում անցկացվող Եվրոպայի Խորհրդի քաղաքական դասընթացների Երևանյան դպրոցի հերթական սեմինարի ընթացքում 2013 թվականի նոյեմբերի 3-ին ՀՀ Վայոց ձորի մարզպետ, տնտեսագիտության թեկնածու, դոցենտ Էդգար Ղազարյանը հանդես է եկել դասախոսությամբ` «Տեղական ինքնակառավարման համակարգի զարգացումը եվրաինտեգրման համատեքստում» թեմայով: ՔԴԵԴ ունկնդիրներին Հայաստանի Հանրապետության տեղական ինքնակառավարման համակարգի զարգացման արդի միտումները և մարտահրավերները ներկայացնելուց հետո Է.Ղազարյանը պատասխանել է նաև նրանց հուզող հարցերին:
«Հողի ուժը» վավերագրական ֆիլմի ցուցադրությունը Վայոց ձորում 04.11.2013
Նոյեմբերի 1-ին Եղեգնաձորի մշակույթի տան մեծ դահլիճում տեղի է ունեցել Աննա Թովմասյանի «Հողի ուժը» վավերագրական ֆիլմի ցուցադրությունը, որին ներկա էին ՀՀ Վայոց ձորի մարզպետի տեղակալ Մելսիկ Հարությունյանը, ՀՀ պաշտպանության նախարարության 4-րդ բանակային կորպուսի հրամանատար, գեներալ-մայոր Անդրանիկ Մակարյանը, ՀՀ ոստիկանության Վայոց ձորի մարզային վարչության սպաներ, զինվորականներ, հարյուրավոր քաղաքացիներ: Ֆիլմը արցախյան ազատամարտի դրդապատճառների, գոյապայքարի ելած հայ ժողովրդի տառապանքների և արցախահայության արդար դատը պաշտպանելու եկած ռուս կամավորների կյանքի պատմության մասին է: Ֆիլմի ցուցադրության կազմակերպմանը աջակցել է ՀՀ Վայոց ձորի մարզպետ Էդգար Ղազարյանը:
Դասական երաժշտության բացառիկ համերգ Վայքում 01.11.2013
2013 թվականի հոկտեմբերի 31-ին Վայքի մշակույթի տան փոքր դահլիճում տեղի ունեցավ Շվեյցարիայի Բազել քաղաքից Հայաստան ժամանած «Ամարանթ» տրիոյի (տավիղ, ֆլեյտա, ալտ) համերգը: Համերգի նախաձեռնությունը պատկանում էր «Հայ փոքրիկ երգիչներ» միջազգային ասոցիացիային: Տրիոյի առաջին համերգը տեղի է ունեցել հոկտեմբերի 30-ին Շուշիի կերպարվեստի թանգարանում: Համերգների աջակիցներն են Շվեյցարիայի մշակույթի նախարարությունը, Արցախի Հանրապետության մշակույթի և երիտասարդության հարցերի նախարարությունը, ՀՀ Լոռու մարզպետարանը և ՀՀ Վայոց ձորի մարզպետարանը:
Քննարկվեցին ՀՀ Վայոց ձորի մարզում շախմատի զարգացման խնդիրները 31.10.2013
ՀՀ Վայոց ձորի մարզպետարանում տեղի ունեցավ քննարկում` նվիրված ՀՀ Վայոց ձորի մարզում շախմատի զարգացման խնդիրներին: Քննարկմանը մասնակցում էին ՀՀ վայոց ձորի մարզպետ Էդգար Ղազարյանը, Հայաստանի շախմատային ֆեդերացիայի փոխնախագահ, Հայաստանի շախմատի ակադեմիայի տնօրեն Սմբատ Լպուտյանը, ՀՀ Վայոց ձորի մարզի շախմատային ֆեդերացիայի նախագահ Ստեփան Ավագյանը, Հայաստանի շախմատի ակադեմիայի մարզային ներկայացուցիչը, քաղաքային համայնքներում շախմատի մարզիչներ, մարզպետարանի պատասխանատուներ:
ՀՀ Վայոց ձորի մարզպետը մասնակցել է ԵՊՀ-ում կազմակերպված գիտաժողովին 30.10.2013
ՀՀ Վայոց ձորի մարզպետ Էդգար Ղազարյանը Երևանի պետական համալսարանի ռեկտոր Ա.Սիմոնյանի հրավերով 2013 թվականի հոկտեմբերի 29-ին Երևանի պետական համալսարանում մասնակցել է «Արևելյան գործընկերություն. նպատականեր–պրակտիկա–մարտահրավերներ» թեմայով կազմակերպված գիտաժողովին, որտեղ հանդես է եկել բացման ողջույնի խոսքով։
