Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ Վայոց ձորի մարզի պատվիրակության այցը Իրանի Իսլամական Հանրապետություն 30.09.2013
ՀՀ Վայոց ձորի մարզի միջազգային համագործակցության շրջանակներում, ս.թ. սեպտեմբերի 27-29-ը Իրանի Իսլամական Հանրապետության Արևմտյան Ատրպատականի նահանգի Խոյի կուսակալություն էր մեկնել մարզպետ Էդգար Ղազարյանի գլխավորած պատվիրակությունը: Պատվիրակության կազմում էին Վայքի քաղաքապետ Հարություն Սարգսյանը, “Ջերմուկ Աշխարհ” առողջարանի գլխավոր բժիշկ Ստեփան Ավագյանը, Վայքի «Տուրիզմի կենտրոնի» տնօրեն Շիրակ Միքայելյանը, Վայոց ձորի մարզպետարանի աշխատակազմի ղեկավար Կամո Սահակյանը, մարզպետարանի աշխատակազմի կրթության, մշակույթի և սպորտի վարչության պետ Արփիար Ղազարյանը, մարզպետի խորհրդական Սերոբ Անտինյանը, մարզպետի օգնական Լիպարիտ Ասատրյանը, ՀՀ մշակույթի նախարարության աշխատակազմի արտաքին կապերի վարչության գլխավոր մասնագետ Տրդատ Չալըմյանը: Հայաստանյան պատվիրակությունն արժանացավ ջերմ ընդունելության, այցելություններ եղան հայկական պատմամշակութային հուշարձաններ, Սբ. Ստեփանոս վանական համալիր: Խոյի կուսակալ Ղոլամ Հոսեին Ամմարիի ուղեկցությամբ պատվիրակությունն այցելեց կուսակալությունում գործող արտադրական ձեռնարկություններ,Խոյի Սուրբ Սարգիս եկեղեցի, մշակութային և կրթական հաստատություններ: Եռօրյա հագեցած ծրագրի ընթացքում մեր պատվիրակությունը հյուրընկալվեց Խոյի քաղաքային խորհրդում, կուսակալության վարչակազմում, ընդունելություններին մասնակցեց նաև Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսին: Վերջում տեղի ունեցավ պատվիրակության պաշտոնական ընդունելություն Խոյի կուսակալության հոգևոր առաջնորդի կողմից, որին մասնակցեցին նահանգի բարձրաստիճան պաշտոնատար անձինք, քաղաքային և մարզային խորհրդի անդամներ, ներկայացուցիչներ:
Հայ-իրանական համատեղ մշակութային ցուցահանդես Խոյում 30.09.2013
Ի կատարումն Հայաստանի Հանրապետության Վայոց ձորի մարզի և Իրանի Իսլամական Հանրապետության Խոյի կուսակալության միջև 2010թ. դեկտեմբերի 5-ին ստորագրված հուշագրի, համատեղ մշակութային ցուցահանդես կազմակերպելու վերաբերյալ, ս.թ. սեպտեմբերի 26-30-ը Իրանի Խոյ քաղաքում տեղի ունեցավ հայ-իրանական մշակութային ցուցահանդես: Համատեղ ցուցահանդեսի պաշտոնական բացմումը տեղի ունեցավ սեպտեմբերի 28-ին, ժապավենը հանդիսավորությամբ կտրեցին ՀՀ Վայոց ձորի մարզպետ Էդգար Ղազարյանն ու ԻԻՀ Խոյի կուսակալ Ղոլամ Հոսեին Ամմարին: Հանդիսությանը ներկա էր Հայաստանում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսին: Հայաստանից Իրանի Իսլամական Հանրապետություն էին մեկնել վայոցձորցի գեղանկարիչներ, քանդակագործներ, փայտագործ վարպետներ: Մշակութային պատվիրակության կազմում էին Կամո Սահակյանը (Եղեգնաձորի մշակույթի տան տնօրեն), Արտյոմ Ղազարյանը, Վարդան Ավետյանը, Էդուարդ Ասատրյանը, Սամվել Հովհաննիսյանը, Բագրատ Սարգսյանը, Սայադ Սայադյանը, Արտյոմ Ղազարյանը, Հայկ Շահբազյանը: Մեր արվեստագետները Իրան էին տարել ավելի քան հարյուր աշխատանք, որոնց թվում` գեղանկարներ, գրաֆիկա, կոլլաժ, բատիկա, քանդակներ, փայտյա և մետաղական աշխատանքներ: Իրանական կողմը նույնպես ներկայացել էր ցուցահանդեսին շուրջ տասը արվեստագետներով, որոնց գործերի մեծ մասը ձեռագործ գոբելեն աշխատանքներ էին: Մշակութային միջոցառումը լայնորեն լուսաբանվեց տեղի լրատվական միջոցներով: Ցուցահանդեսի բացման հանդիսավոր արարողությանը ներկա էին Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսին, ԻԻՀ ԱԳՆ ներկայացուցիչ, Խոյի քաղաքի ակտիվի և մեր պատվիրակության ներկայացուցիչներ:
Քուվեյթի դեսպանի այցը ՀՀ Վայոց ձորի մարզ 25.09.2013
2013 թվականի սեպտեմբերի 24-ին ՀՀ Վայոց ձորի մարզ էր այցելել Հայաստանի Հանրապետությունում Քուվեյթի արտակարգ և լիազոր դեսպան Բասսամ Մուհամմադ Ալ-Քաբանդին: Մարզպետարանում դեսպանին դիմավորեցին ՀՀ Վայոց ձորի մարզպետ Էդգար Ղազարյանը և մարզպետարանի աշխատակազմի ղեկավար Կամո Սահակյանը: Մարզպետի մոտ տեղի ունեցած աշխատանքային հանդիպման ընթացքում քննարկվեցին տարածքային իշխանությունների մակարդակով Հայաստանի և Քուվեյթի միջև բարեկամության և համագործակցության զարգացման խնդիրներ և հեռանկարներ: Մասնավորապես, դեսպանի կողմից առաջարկվեց բարեկամություն հաստատել ՀՀ Վայոց ձորի մարզի և Քուվեյթի Ալ-Ահմադի նահանգի միջև, ինչը մարզպետի կողմից ընդունվեց մեծ ոգևորությամբ: Դեսպանի համոզմամբ Քուվեյթի գործարար շրջանակների, ինչպես նաև ներդրումային հիմնադրամների համար գրավիչ են Վայոց ձորում, հատկապես Ջերմուկ քաղաքի զարգացման ծրագրերում ներդրում իրականացնելը:
Բերքի տոն Գոմք համայնքում 25.09.2013
2013 թվականի սեպտեմբերի 24-ին ՀՀ Վայոց ձորի մարզի Գոմք համայնքում տեղի ունեցավ «Բերքի ցուցահանդես-տոնահանդես» միջոցառումը: Այն կազմակերպվել էր Օքսֆամի կողմից իրականացվող «Կայուն զարգացման ծրագրի» շրջանակներում` մարզային գործընկեր «Աշխատանք և Հայրենիք» ՀԿ-ի կողմից: Միջոցառմանը մասնակցում էին շահառու վեց համայնքների կանանց կոոպերատիվների ավելի քան 100 ներկայացուցիչներ, ովքեր ներկայացնում էին իրենց արտադրանքը, ինչպես նաև իրենց գյուղերին բնորոշ բերքն ու բարիքը: Յուրաքանչյուր համայնք ներկայացնում էր նաև տեղական խոհանոցին բնորոշ մի ճաշատեսակ: Միջոցառմանը մասնակցում էին ՀՀ Վայոց ձորի մարզպետ Էդգար Ղազարյանը, աշխատանքային այցով ՀՀ Վայոց ձորի մարզ ժամանած Քուվեյթի արտակարգ և լիազոր դեսպան Բասսամ Մուհամմադ Ալ-Քաբանդին, Օքսֆամ և Քաունթրփարթ Ինթերնեյշնլ կազմակերպության ներկայացուցիչներ, համայնքների ղեկավարներ, բազմաթիվ հյուրեր: Բերքի տոնահանդեսից հետո տեղի ունեցավ Գոմք համայնքի զարգացման համաժողովը` ՀՀ վայոց ձորի մարզպետի տեղակալ Արամ Գրիգորյանի, համայնքների ղեկավարների, ծրագրեր իրականացնող տարբեր տեղական, միջազգային և մասնավոր կազմակերպությունների ներկայացուցիչների մասնակցությամբ:
Ֆրանսիացի լրագրողները Վայոց ձորի մարզում 25.09.2013
2013 թվականի սեպտեմբերի 24-ին Նորավանքի վանական համալիրի տարածքում ՀՀ Վայոց ձորի մարզպետ Էդգար Ղազարյանը հանդիպում ունեցավ «Արենի գինու փառատոնի» շրջանակներում ճանաչողական այցով Հայաստան ժամանած ֆրանսիացի մի խումբ լրագրողների և տուրիստական կազմակերպությունների ներկայացուցիչների հետ: Հանդիպման ընթացքում Է.Ղազարյանը ներկայացրեց ՀՀ Վայոց ձորի մարզում տուրիզմի զարգացման, ինչպես նաև «Արենի գինու փառատոն»-ի կազմակերպման ծրագրերը: Է.Ղազարյանը սիրով պատասխանեց ֆրանսիացի հյուրերին հետաքրքրող հարցերին: Այցի նպատակն էր Ֆրանսիայի առաջատար լրատվամիջոցների և տուրիստական կազմակերպությունների միջոցով Ֆրանսիայում ներկայացնել և տարածել Վայոց ձորի զբոսաշրջային գրավչությունները` խթանելով ֆրանսիացի զբոսաշրջիկների այցը ՀՀ վայոց ձորի մարզ:
Վայոց ձորը ծանր կորուստ կրեց: Կյանքից անժամանակ հեռացավ ՀՀ մշակույթի վաստակավոր գործիչ, Եղեգնաձորի երաժշտական դպրոցի երկարամյա տնօրեն Ֆիլիպ Հարությունի Բալոյանը: Ընդամենը մեկ տարի առաջ, հոկտեմբերի 1-ին, մենք մեծագույն սիրով և ոգևորությամբ տոնում էինք Ֆիլիպ Բալոյանի ծննդյան 60-ամյա հոբելյանը: Կարճ ապրեց նա, սակայն մեծ հետք թողեց մեր մշակութային կյանքի պատմության մեջ: Առանձնապես մեծ ու անգնահատելի է Ֆիլիպ Բալոյանի ավանդը մարզում դասական արվեստի նկատմամբ սեր ու հետաքրքրություն ձևավորելու և մարզի արվեստասեր հասարակայնության ականջին այն ընկալելի դարձնելու գործում:Նա հարգված տնօրեն էր, ցանկալի ընկեր, սիրված հայր և լավ ամուսին: Անգնահատելի է Ֆիլիպ Բալոյանի մանկավարժական վաստակը: Նա իր տաղանդն անշահախնդրորեն փոխանցում էր իր սաներին` վերածելով նրանց հրաշալի երաժիշտների և երգիչների: Բոլորիս սրտերում հավերժ վառ կմնա նրա պայծառ հիշատակը, իսկ հիշողություններում՝ նրա հնչեղ ձայնն ու անկեղծ ծիծաղը:
