Վայոց ձորի մարզպետի աշխատակազմ

Տեղեկացնում ենք Ձեզ, որ ՀՀ կառավարության 2024 թվականի օգոստոսի 22-ի N 1392-Լ որոշման մեջ կատարված փոփոխությունների համաձայն՝ ՀՀ Վայոց ձորի մարզն ընդգրկվել է «Տավարաբուծության մեջ մթերատվության բարձրացման» փորձնական ծրագրում։

  Հրավիրում ենք տավարաբուծությամբ զբաղվող տնտեսավարողներին և համապատասխան ծառայություններ մատուցող կազմակերպություններին՝ մասնակցելու կովերի արհեստական սերմնավորման պետական աջակցության փորձնական ծրագրին: 

  Համաձայն ծրագրի՝ 2026 թվականին Վայոց ձորի մարզում նախատեսվում է իրականացնել 400 գլուխ կովերի  արհեստական սերմնավորում ։

  Ծրագրի նպատակը. Բարելավել տեղական տավարի գենոֆոնդը և բարձրացնել կաթնատվությունը՝ կիրառելով համաշխարհային դասական ցեղերի (Հոլշտին, Շվից, Սիմենթալ և այլն) բարձրորակ սերմնահեղուկ:

Ֆինանսական պայմաններ.

• Մեկ գլուխ կովի սերմնավորման արժեքը՝ 15,000 դրամ:
• Պետական փոխհատուցում՝ 10,000 դրամ (շուրջ 70%):
• Տնտեսավարողի վճար՝ ընդամենը 5,000 դրամ:

Ովքե՞ր կարող են դիմել.

1.  Տնտեսավարողները (ֆիզիկական և իրավաբանական անձինք)։ Ծրագրով  նախապատվությունը տրվում է ցանկացած նպատակով սոցիալական աջակցություն ստացող տնտեսավարողներին, ինչպես նաև զինվորական ծառայության պարտականությունների կատարման ժամանակ մարտական հերթապահության կամ գործողությունների իրականացման արդյունքում հաշմանդամ դարձած քաղաքացիներին: Կենդանիները պետք է լինեն համարակալված և հաշվառված ԱՆԻ ՊԱՍ համակարգում:
2. Ծառայություն մատուցող կազմակերպություններ. Իրավաբանական անձինք կամ ԱՁ-ներ, որոնք ունեն մասնագիտական հավաստագիր, փորձառու մասնագետներ և դրական վարկային ու հարկային պատմություն:

Կազմակերպությունների համար դիմելու կարգը. Հայտերը պետք է ներկայացվեն էլեկտրոնային տարբերակով համայնքապետարան կամ մարզպետի աշխատակազմ՝ հայտարարության հրապարակումից հետո 10 աշխատանքային օրվա ընթացքում:

 Պահանջվող փաստաթղթեր (կազմակերպությունների համար).

• Սերմնահեղուկի ծագման և ներկրման հավաստագրեր (ներկրված 2023թ. կամ հետո):
• Մասնագետների կրթության և փորձի վերաբերյալ փաստաթղթեր:
• Տեղեկանքներ վարկային և հարկային պարտավորությունների վերաբերյալ:

 Արհեստական սերմնավորումը թույլ է տալիս կազմակերպել կովերի ծինը հավասարաչափ, ինչը կկանխի կաթի գերարտադրության կամ պակասորդի խնդիրները տարվա տարբեր ամիսներին:

  Մանրամասն տեղեկությունների համար կարող եք դիմել ՀՀ Վայոց ձորի մարզպետի աշխատակազմ, համայնքապետարաններ, կամ այցելել ՀՀ էկոնոմիկայի նախարարության պաշտոնական կայք էջ: