Վայոց ձորի մարզպետի աշխատակազմ

   Սիրելի՛ ուսուցիչներ, խորին ակնածանքով շնորհավորում եմ ձեզ մասնագիտական տոնի առթիվ։
   Այսօր և միշտ ընդունեք իմ երախտագիտության և դրվատանքի խոսքերը. ձեզ է վստահված ամենաբարդ և պատասխանատու աշխատանքը՝ սերունդներ կրթել, ձևավորել լավագույն արժեհամակարգ, սերմանել վեհ գաղափարներ, նոր հորիզոններ բացել նրանց առջև, ճախրելու թևեր տալ, ոգեշնչել, դնել վաղվա կայուն ապագայի հաստատուն հիմքերը․․․
   Բոլոր ժամանակներում էլ անգնահատելի և բացառիկ են եղել ձեր դերն ու ավանդն ամուր պետության, առողջ հասարակության կերտման գործում։
   Ձեր մասնագիտությունը պահանջում է անմնացորդ սեր և նվիրվածություն, անվերջ արարելու, փնտրելու, նոր լուծումներ գտնելու ամենօրյա աշխատանք, և դուք, ձեր մասնագիտության բարձր կոչմանն ու առաքելությանը հավատարիմ, դարձնում եք դպրոցը կրթության դարբնոց և հարազատ միջավայր։
   Սիրելի՛ ուսուցիչներ, շարունակե՛ք նույն պատասխանատվությամբ, անսահման հոգատարությամբ, անծիր ջերմությամբ և անսպառ համբերատարությամբ կատարել ձեր առաքելությունը, ձեր հայրենանվեր գործունեությունը։
   Թող ձեր աշխատանքը միշտ արժևորված լինի, իսկ յուրաքանչյուր աշակերտի հաջողություն և ձեռքբերում դառնան ձեր աշխատանքի ամենամեծ պարգևն ու գնահատականը։
   Մաղթում եմ ձեզ առողջություն և հաջողություն, մասնագիտական աշխատանքում՝ անսպառ եռանդ և կորով։ Թող ձեր սրտերում միշտ թևածի աշխատանքի և երեխաների հանդեպ այն սերը, որ մղում է ձեզ հրաշքներ գործել, ստեղծել, ստեղծագործել…