Վայոց ձորի մարզպետի աշխատակազմ

   Սիրելի՛ ուսուցիչներ, կրթության ոլորտի նվիրյալնե՛ր, մեծագույն հարգանքով ու երախտագիտությամբ շնորհավորում եմ ձեզ մասնագիտական տոնի՝ Ուսուցչի օրվա առթիվ:
   Հայ ժողովուրդը դարեր ի վեր առանձնակի ակնածանքով է վերաբերել կրթությանը, գնահատել և արժևորել ուսուցչի դերը հայապահպանման, սերունդների՝ ազգային և համամարդկային արժեքներով դաստիարակման, անհատի ձևավորման բարդ ու դժվարին աշխատանքում՝ այն միշտ համարելով առաքելություն և պատասխանատվություն ներկայի և ապագայի հանդեպ:
   Նոր ժամանակներում, նոր մարտահարավերներին ընդառաջ, առանցքային արժեքները նույն են մնացել. ուսուցիչն է ծնողի հետ համատեղ ձևավորում ապագա քաջ զինվորին, հայրենասերին, գիտնականին, բանիմաց մանկավարժին, հմուտ շինարարին, իր հայրենիքի ճակատագրով մտահոգ քաղաքացուն, բարոյական բարձր նկարագիր ունեցող անհատին և այլն: Շարքը կարելի է անվերջ շարունակել… Եվ ուրեմն այսօր և միշտ, սիրելի՛ ուսուցիչներ, ձեզ ենք հղում երախտագիտության խոսքեր վստահված աշխատանքում ներդրած ջանքերի, սիրո, նվիրվածության համար։
   Շարունակե՛ք ձեր բացառիկ դերն ու ավանդն ունենալ ամուր պետության և առողջ հասարակության կերտման, երկու կարևոր օղակների՝ դպրոցի և ընտանիքի կամրջման գործում: Ձեր առաքելությանը հավատարիմ՝ շարունակեք կրթել և դաստիարակել մարդկային լավագույն որակներով, ազնիվ մղումներով, քաղաքացիական բարձր գիտակցությամբ օժտված անհատներ, վարակել աշակերտներին գիտելիքը արժևորելու և կրթությունը գնահատելու ձեր սիրով:
   Դուք եք ձեր սաներին հաղթանակներ կերտելու, փոքր ու մեծ քայլերով հաջողությունների հասնելու, մարդկային սկզբունքներին հավատարիմ լինելու, նպատակասլաց , աշխատասեր, լայնախոհ լինելու և այլ կարևոր դասեր ևս ուսուցանում, տալիս թռիչքի թևեր, լուսավորում հորիզոններ:
   Սիրելի՛ ուսուցիչներ, մաղթում եմ ձեզ առողջություն և լավատեսություն, անսպառ եռանդ և կորով, ստեղծագործական անսահման երևակայություն և մտքի թռիչք՝ ձեր աշխատանքներն արդյունավետ իրականացնելու, ինքնատիպ և նորարար մտահղացումները կյանքի կոչելու համար…