Վայոց ձորի մարզպետի աշխատակազմ

  ՀՀ Վայոց ձորի մարզպետի աշխատակազմում տեղի ունեցավ ,,Եղեգիս համայնքի հզորացում մեղվաբուծության խթանման միջոցով,, միջոցառումը, որին մասնակցում էին մարզպետ Կոլյա Միքաելյանը, Վայրի բնության և մշակութային արժեքների պահպանման հիմնադրամի տնօրեն Ռուբեն Խաչատրյանը, մարզպետի աշխատակազմի, Եղեգիսի համայնքապետարանի ներկայացուցիչներ, ծրագրի շահառուներ:
  Մարզպետ Կոլյա Միքաելյանը միջոցառման բացման ելույթում բարձր գնահատեց հիմնադրամի ներդրած ջանքերը տարիներ շարունակ Վայոց ձորի մարզում տարաբնույթ ծրագրեր և միջոցառումներ իրականացնելիս, որոնք միտված են եղել մարդ-վայրի բնություն ներդաշնակության և համերաշխության ապահովմանը, դրանով միաժամանակ նպաստել տարբեր համայնքներում սոցիալ-տնտեսական և այլ խնդիրների լուծմանը:
   Վայրի բնության և մշակութային արժեքների պահպանման հիմնադրամի տնօրեն Ռուբեն Խաչատրյանն իր խոսքում նշեց, որ իրենց աշխատանքի կարևոր ուղղություններից է մարդ-վայրի կենդանի հակամարտության մեղմացումը, որը վերջին տարիներին սրվել է՝ կլիմայի փոփոխությամբ պայմանավորված, և ,,Մեղմելով կլիմային փոփոխությամբ պայմանավորված մարդ-վայրի կենդանի ահագնացող կոնֆլիկտը Հայաստանում,, ծրագրի տարբեր բաղադրիչներով նպաստում են խնդիրների լուծմանը՝ բնապահպանական, սոցիալ-տնտեսական և այլն:
   Հիմնադրամի ներկայացուցիչները ընդհանուր գծերով ներկայացրին մարզում կատարած ծրագրերը , արդյունքները, ապա անդրադարձան ,,Մեղմելով կլիմային փոփոխությամբ պայմանավորված մարդ-վայրի կենդանի ահագնացող կոնֆլիկտը Հայաստանում,, ծրագրի նպատակներին և արդյունքներին:
   Ծրագրի շրջանակներում, ի թիվս մի շարք աշխատանքների, Եղեգիս համայնքի բնակավայրերում իրականացվել են մեղվաբուծության վերաբերյալ դասընթացներ՝ թիրախավորելով ավելի քան 150 սկսնակ կամ դեռևս մեղվաբուծությամբ չզբաղվող շահառուների:
   Այնուհետև դասընթացի մասնակիցներից մի շարք չափանիշների հիման վրա ընտրվել են 30 շահառու, ում կտրամադրվի մեղվաբուծական պարագաների փաթեթ՝ 500 000 դրամ արժողությամբ /ներառյալ դասընթացավարի ծառայության արժեքը/ ՝ զարգացելու կամ սկսելու մեղվաբուծությունը, իսկ Եղեգիս համայնքին կնվիրաբերվի մեղվաբուծության մի շարք պարագաներ համայնքի ընդհանուր օգտագործման համար:
   Քննարկումներում ընդգծվեցին Եղեգիս համայնքի՝ մեղվաբուծության զարգացման և ընդլայնման համար բնակլիմայական նպաստավոր պայմանների և առկա ներուժի հանգամանքները, որոնք լիարժեք և արդյունավետ օգտագործելու դեպքում այն կարող է դառնալ համայնքի այցեքարտերից մեկը: