Տեղեկատվական կենտրոն
Նորություններ
Հանդիպում Արտաբույնք բնակավայրի բնակիչների հետ
01.04.2025
Օրերս ՀՀ Վայոց ձորի մարզպետ Կոլյա Միքաելյանը, ՀՀ Ազգային ժողովի պատգամավոր Սերգեյ Բագրատյանը, մարզպետի աշխատակազմի ներկայացուցիչները և ոլորտային պատասխանատուները հանդիպեցին Եղեգիս համայնքի Արտաբույնք բնակավայրի բնակիչների հետ։
ՀՀ Վայոց ձորի մարզպետ Կոլյա Միքաելյանը, ողջունելով ներկաներին, նշեց, որ Արտաբույնք բնակավայր այցի նպատակն է տեղում ծանոթանալ բնակիչներին մտահոգող հարցերին, դիտարկել բնակավայրում առկա խնդիրները, ինչպես նաև ներկայացնել, թե ինչ է արվել և ինչ է նախատեսվում իրականացնել ինչպես Արտաբույնք բնակավայրում, այնպես էլ Եղեգիս համայնքում և ՀՀ Վայոց ձորի մարզում ընդհանրապես, միաժամանակ իրազեկել ՀՀ կառավարության կողմից տարբեր ոլորտներում մշակված և գործող աջակցության ծրագրերի մասին։
ՀՀ Վայոց ձոր մարզի Եղեգիս համայնքի ղեկավարի առաջին տեղակալ Ահարոն Գաբրիելյանը նշեց, որ Վայոց ձորի մարզպետ Կոլյա Միքաելյանի հանձնարարությամբ և օժանդակությամբ այս ձևաչափով Եղեգիս համայնքում արդեն անց են կացվել են մի շարք հանդիպումներ բնակիչների հետ, արձանագրվել են բարձրացված խնդիրները և իրավասությունների շրջանակում տրվել լուծումներ։
Եղեգիս համայնքի Արտաբույնք բնակավայրի վարչական ղեկավար Արմեն Սետրակյանը ներկայացրեց վերջին տարիներին բնակավայրում կատարված աշխատանքները, առկա խնդիրները։
Այնուհետև մարզպետի աշխատակազմի ոլորտային պատասխանատուները ներկայացրին Եղեգիս համայնքում իրականացված և առաջիկայում նախատեսվող ծրագրերը։
Հանդիպումը շարունակվեց հարց ու պատասխանի ձևաչափով։ Բնակիչների հարցերն առնչվում էին ոռոգման և խմելու ջրի խնդիրներին, սոցիալական և առողջապահական ոլորտներին, հողերի վարձակալությանը և հովվի տնակներին և այլ խնդիրների։
Ամփոփելով հանդիպումը՝ ՀՀ Վայոց ձորի մարզպետ Կոլյա Միքաելյանը և ՀՀ Ազգային ժողովի պատգամավոր Սերգեյ Բագրատյանը նշեցին, որ նման այցերը կրելու են շարունակական բնույթ, և բնակիչների խնդիրները լինելու են իրենց մշտական ուշադրության կենտրոնում։