Տեղեկատվական կենտրոն
Նորություններ
Այս տարի «Երկրի ժամ»-ն ամբողջ աշխարհում անցկացվելու է մարտի 22-ին
17.03.2025

Այս տարի «Երկրի ժամ»-ն ամբողջ աշխարհում անցկացվելու է մարտի 22-ին, ուստի կոչ ենք անում մարտի 22-ին` ժամը 20:30-21:30-ին, միանալ և աջակցել շարժմանը՝ մեկ ժամով անջատելով բնակարանների, առանձնատների, հասարակական նշանակության կառույցների և շենքերի արտաքին լուսավորությունը:
Միասին մեր մոլորակի համար կարող ենք անել ավելին։ Համախմբվելով Երկիրը պահպանելու շուրջ` մենք կօգնենք կերտել ավելի կանաչ ապագա։
Տեղեկացնենք, որ 2008 թվականից Բնության համաշխարհային հիմնադրամի (WWF) հայաստանյան մասնաճյուղի նախաձեռնությամբ Հայաստանում իրականացվում է աշխարհի ամենամեծ բնապահպանական շարժումը՝ «Երկրի ժամ»-ը, որը միավորում է միլիոնավոր մարդկանց Երկիր մոլորակի պահպանության համար լուծումներ գտնելու և միջոցներ ձեռնարկելու շուրջ:
Միջոցառմանը մասնակցում է ավելի քան 190 երկիր և 7000 քաղաք՝ 1 ժամով անջատելով տվյալ երկրում խորհրդանիշ համարվող շենքերի, շինությունների, ինչպես նաև քաղաքների և բնակավայրերի հիմնական փողոցների լուսավորությունը:
Այսպիսով, մարտի 22-ին՝ ժամը 20:30-21:30-ին, միանանք Երկրի ամենամեծ ժամին։