Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ Վայոց ձորի մարզպետ Կոլյա Միքաելյանի շնորհավորական ուղերձը Մարտի 8-ի առթիվ
08.03.2025
Սիրելի՛ կանայք, մայրեր, քույրեր, դուստրեր
Սրտանց շնորհավորում եմ բոլորիդ Մարտի 8-ի՝ Կանանց միջազգային օրվա առթիվ:
Տոնը հրաշալի առիթ է նորից ու նորից գնահատելու կնոջը, նրան ակնածանքի և երախտագիտության խոսքեր ուղղելու, վերարժևորելու և ընդգծելու նրա անուրանալի դերակատարությունը ընտանիքի համերաշխության պահպանման, զավակների դաստիարակության, գեղեցիկ ավանդույթների փոխանցման հարցում։ Եվ բնավ էլ պատահական չէ, որ հայ կնոջը բնութագրելիս ավանդաբար շեշտում ենք նրա անսահման բարությունն ու մեծահոգությունը, անսպառ նվիրվածությունն ու խելամտությունը։
Կանայք միաժամանակ ուժեղ են և պատասխանատու, վճռական և գործունյա, ակտիվորեն ընդգրկվում են հասարակական կյանքի տարբեր ոլորտներում,ներգրավվում ձեռներեցության, հասարակական կազմակերպությունների, տեղական ինքնակառավարման և պետական կառավարման մարմինների գործունեության ասպարեզներում:
Այսօր և միշտ մեծարման և առանձնահատուկ գնահատման են արժանի այն որդեկորույս մայրերը, ում որդիները հերոսաբար նահատակվեցին հանուն հայրենիքի պաշտպանության սուրբ գործի, և այն այրիացած կանայք, ովքեր իրենց ուսերին են կրում ընտանիքների հոգսի ծանրությունը և իրենց զավակներին սատարում են հաղթահարելու բոլոր դժվարությունները։
Սիրելի՛ կանայք, եղե՛ք շրջապատված սիրով և ջերմությամբ, գնահատված և մեծարված, շարունակե՛ք գեղեցկացնել և իմաստավորել կյանքը ձեր ողջամտությամբ, քնքշությամբ, իմաստնությամբ, շարունակե՛ք գործել, ստեղծել, արարել, ներդնել ձեր ներուժը՝ հանուն մեր ընտանիքների ամրության , հասարակության բարօրության, պետության զարգացման։
Թող ձեզ մշտապես ուղեկից լինեն կանացի հմայքն ու գեղեցկությունը, անսահման բարությունն ու պայծառ ժպիտը, հոգու արիությունն ու ամուր կամքը։
