Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Հանդիպում Արենի համայնքի բնակիչների հետ
04.03.2025
ՀՀ Վայոց ձորի մարզպետ Կոլյա Միքաելյանի նախաձեռնությամբ ՀՀ Աժ պատգամավորներ Սերգեյ Բագրատյանը և Արման Եղոյանը Արենի համայնքում հանդիպեցին բնակիչների հետ։
Հանդիպմանը մասնակցում էին նաև Վայոց ձորի մարզպետի աշխատակազմի և Արենիի համայնքապետարանի ներկայացուցիչներ, Արենի համայնքի բնակավայրերի վարչական ղեկավարները, ավագանու անդամները։
Մարզպետ Կոլյա Միքաելյանը կարևորեց այս ձևաչափով բնակիչների հետ անմիջական հանդիպումները,օրենսդիր մարմնի ներկայացուցիչների հետ շփումները, որոնք կկրեն շարունակական բնույթ և կկազմակերպվեն նաև մարզի մյուս համայնքներում։
Արենի համայնքի ղեկավար Հուսիկ Սահակյանը նշեց, որ սա լավ հնարավորություն է բնակիչների համար դիմելու ՀՀ ԱԺ պատգամավորներին իրենց հուզող թեմաներով, ապա ներկայացրեց համայնքում անցած տարվա ընթացքում իրականացված և 2025 թվականին նախանշված ծրագրերը:
Այնուհետև բնակիչներն իրենց մտահոգող տարաբնույթ հարցերն ուղղեցին պատգամավորներին, մարզային և համայնքային իշխանությունների ներկայացուցիչներին։ Դրանք վերաբերում էին հողատեսքերի փոփոխությանը, սահմանամերձ բնակավայրերին տրամադրվող պետական աջակցության, մասնավորապես բնակարանաշինության ծրագրերում ընդգրկվելուն, համայքային կյանքի ակտիվացմանը, հաճախ հանդիպող իրավական նորմերի կիրառմանն ընթացակարգերին և այլն։
Աժ պատգամավորները բարձրացված հարցերի մի մասին տվեցին պարզաբանումներ, իսկ հավելյալ ուսումնասիրություն պահանջող հարցերն արձանագրվեցին համապատասխան գերատեսչություններին ներկայացնելու և դրանց հետագա ընթացքի մասին բնակիչներին տեղեկություններ տրամադրելու համար։
