Վայոց ձորի մարզպետի աշխատակազմ

   ՀՀ Վայոց ձորի մարզպետ Կոլյա Միքաելյանն ընդունել է «Տեր և տիկին Թորոս և Լուսին Սուսանի» բարեգործական հիմնադրամի գործադիր տնօրեն Լևոն Երնջակյանին և հոգաբարձուների խորհրդի անդամ Պետրոս Լազարյանին։Հանդիպմանը մասնակցում էին նաև մարզպետի տեղակալ Արսեն Խաչատրյանը և մարզպետի աշխատակազմի առողջապահության և սոցիալական ոլորտի հարցերի վարչության գլխավոր մասնագետ Ցողիկ Բաբայանը։
   Հանդիպման նպատակն էր քննարկել հիմնադրամի կողմից Վայոց ձորի մարզում իրականացվելիք նախաձեռնության հնարավորությունները և հեռանկարները, մասնավորապես <<Ավագ սերնդի պարտեզներ․ժամանց և զբաղվածություն>> ծրագրի շրջանակներում ավագ սերնդի ներկայացուցիչների համար ցերեկային կենտրոնի հիմնման և գործունեության ծավալման հարցերը։
   Մարզպետ Կոլյա Միքաելյանը բարձր է գնահատել հիմնադրամի կողմից իրականացվելիք այս նախաձեռնությունը՝ ընդգծելով, որ այն պահանջված ծառայություն է, ավագ սերնդի ներկայացուցիչների հոգսերը, խնդիրները, զբաղվածության հարցերը պետք է մշտապես ուշադրության և հոգածության կենտրոնում լինեն, դրանց լուծման խնդիրները՝ պատկան մարմինների աշխատանքի կարևոր բաղադրիչը։
   Հյուրերը ներկայացրել են բարեգործական հիմնադրամի կողմից <<Ավագ սերնդի պարտեզներ․ժամանց և զբաղվածություն>> ծրագրի շրջանակներում կատարած աշխատանքները և Վայոց ձորի մարզում ևս նման կենտրոնի ստեղծման հեռանկարները։
   Այնուհետև կողմերը քննարկել են նախատեսվող տարածքի չափանիշներին, կենտրոնի շահառուների ընտրությանը, կարիքների գնահատմանը, մատուցվող ծառայությունների ուղղություններին առնչվող մի շարք հարցեր։ Քննարկումներում կարևորվել են աշխատանքի կազմակերպման ճիշտ շեշտադրումները և մոտեցումները, որպեսզի կենտրոնը հասարակության կողմից ընկալվի ոչ միայն խնամքի կենտրոն, այլ մի միջավայր, որտեղ ավագ սերնդի ներկայացուցիչները կարող են շփվել, գտնել ընդհանուր հետաքրքրություններ, դրսևորել իրենց հմտությունները, օգտվել տարբեր ծառայություններից։
   ՀՀ Վայոց ձորի մարզպետ Կոլյա Միքաելյանը պատրաստակամություն է հայտնել ցուցաբերել անհրաժեշտ աջակցություն մարզում կենտրոնի աշխատանքների մեկնարկի և հետագա գործունեության հարցերում։