Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ Վայոց ձորի մարզպետ Կոլյա Միքաելյանի շնորհավորական ուղերձը ՀՀ Զինված ուժերի կազմավորման 33-րդ տարեդարձի առթիվ
28.01.2025
Սիրելի՛ հայրենակիցներ,
Հարգելի՛ զինվորականներ,
Ջերմորեն շնորհավորում եմ Հայաստանի Հանրապետության Զինված ուժերի կազմավորման 33-րդ տարեդարձի կապակցությամբ:
Տոնը մեծ խորհուրդ ունի. ՀՀ զինված ուժերի կազմավորումը և հզորացումը հայ ժողովրդի կամքի, անսասան ոգու, ֆիզիկական, բարոյական , հոգևոր ուժերի միաձուլման փայլուն արդյունք էին:
Սրանք պարզապես տարիներ չէին, այլ ժամանակի անխուսափելի հրամայականով և Արցախյան պատերազմի բովում ստեղծված հայոց բանակի թրծման և կայացման, զուգահեռաբար փառավոր հաղթանակներ կերտելու, հայոց նորանկախ պետականության հիմքերն ամուր պահելու, մեր երկրի խաղաղությունը երաշխավորելու ժամանակաշրջան էր:
Այս բարդ ու հակասական, երկար ու ձիգ տարիների ընթացքում ՀՀ զինված ուժերը, հայոց զինվորների սխրանքները , հայրենասիրության անօրինակ դրսևորումները դարձան հայ ժողովրդի ազգային զարթոնքի, ազգային գաղափարախոսության, հայրենասիրական դաստիարակության, համազգային նպատակների իրականացման առանցքային արժեքները:
Խորին երախտագիտությունս բանակաշինության ակունքներում կանգնած նվիրյալներին, անսահման հարգանքս այսօր և բոլոր ժամանակներում հայոց բանակի հզորացման և մարտունակության բարձրացմանը նպաստած և նպաստող այն անձանց, ովքեր խորապես գիտակցեցին և կարևորեցին հզոր և մարտունակ բանակ ունենալու անհրաժեշտությունը:
Ցավոք, պատերազմող երկրում բանակի կազմավորման ընթացքն անկորուստ և դյուրին չեղավ. խորին խոնարհումս հայրենիքի խաղաղ արշալույսների համար կյանքը նվիրած քաջորդիներին, ովքեր օրհասական ժամին չնահանջեցին և սեփական կյանքը դրեցին հայրենիքի փրկության զոհասեղանին:
Այսօր էլ մեր պետության առջև, ՀՀ զինված ուժերի առջև ծառացած են բազում մարտահրավերներ, որոնց դիմագրավելու համար պետք է լինել միասնական և համախմբված, հայրենասեր և պետականամետ, տոկուն և համբերատար: ՀՀ Զինված ուժերի կազմավորման տոնը մեկ անգամ ևս ուղերձ է բոլորիս համախմբվելու ազգային գաղափարների և նպատակների շուրջ, միասնական կամքով և ողջամտորեն հաղթահարելու մարտահրավերները:
Անվտանգ և խաղաղ ծառայություն եմ մաղթում ՀՀ Զինված ուժերում այսօր իրենց պարտքը արժանապատվորեն և բարձր գիտակցությամբ կատարող բոլոր անձանց: Շնորհակալություն եմ հայտնում նաև նրանց, ովքեր իրենց պատասխանատու և նվիրված աշխատանքով ամուր և հաստատուն են պահում թիկունքը: Պետք է զինվել լավատեսությամբ, բարձր պահել ՀՀ Զինված ուժերի մարտունակությունը և հաղթական ոգին:
Փա՛ռք ու պատի՛վ ՀՀ Զինված ուժերին:
Կրկին շնորհավորում եմ Հայաստանի Հանրապետության բոլոր քաղաքացիներին՝ մաղթելով խաղաղություն, լավատեսություն, միաբանություն եւ բարեկեցություն, թող որ մեր ազնիվ մղումներով և կառուցողական քայլերով նպաստենք մեր հայրենիքի առաջընթացին և բարօրությանը:
