Վայոց ձորի մարզպետի աշխատակազմ

   Դեկտեմբերի 3-ին Վայոց ձորի մարզպետ Կոլյա Միքաելյանը և Ջերմուկ համայնքի ղեկավար Վահագն Արսենյանը համայնքապետարանում հանդիպեցին Ջերմուկում գործող առողջարանների, հյուրանոցների և հյուրատների ներկայացուցիչների հետ։
Քննարկվել են 2025 թվականին Ջերմուկում նախատեսվող Համահայկական ձմեռային խաղերին, ինչպես նաև ոլորտի զարգացման և ընդլայնման հեռանկարներին, քաղաքի՝ որպես առողջարանային և զբոսաշրջային կենտրոնի ներուժի լիարժեք օգտագործմանն առնչվող մի շարք հարցեր։
   Կարևորվել են խաղերի ընթացքում հյուրերին և մարզիկներին առաջարկվող ծառայությունների ու պայմանների հնարավորինս պատշաճ ապահովումը, որը հետագայում կարող է նպաստել զբոսաշրջային ոլորտի զարգացմանը նաև ձմռան սեզոնին։
   Այնուհետև Վայոց ձորի մարզպետ Կոլյա Միքաելյանը և Ջերմուկ համայնքի ղեկավար Վահագն Արսենյանը շրջայց են կատարել քաղաքում՝ գնահատելու իրականացված և ընթացքի մեջ գտնվող ծրագրերի արդյունքները։
   Շրջայցի ավարտին դիտարկվել են Ջերմուկի խորհրդանիշ եղնիկի արձանին հարակից դիտահրապարակի կառուցման աշխատանքները, որոնք կավարտվեն 2025 թվականին։