Վայոց ձորի մարզպետի աշխատակազմ

   Սիրելի՛ ուսուցիչներ, կրթության ոլորտի նվիրյալնե՛ր, մեծագույն հարգանքով ու սիրով շնորհավորում եմ ձեզ մասնագիտական տոնի՝ Ուսուցչի օրվա առթիվ:
Հայ մարդը դարեր շարունակ առանձնահատուկ ակնածանքով և երախտագիտությամբ է գնահատել մանկավարժի գործը` նրան վերապահելով նոր սերնդի կրթության և քաղաքացու ձևավորման, հայապահպանման, ազգային և համարդկային արժեքներով դաստիարակելու դժվարին ու պատասխանատու աշխատանքը:
   Յուրաքանչյուրիս կյանքում ուսուցիչը թողնում է անփոխարինելի ավանդ, հետք, արժեհամակարգ, որոնք կյանքի հետագա փուլերում դառնում են մեզ առաջ մղող հիմնական խթաններ, լուսատու փարոս և անսխալ ուղեցույց:
   Ձեր կատարած դժվարին, բայց և շնորհակալ աշխատանքի արդյունքում է, որ, ի դեմս կիրթ սերնդի, կանգուն են պետության ու ազգի հիմքերը: Կրթելով ու դաստիարակելով մեր երեխաներին, սերմանելով նրանց մեջ սեր ու հարգանք գիտելիքի հանդեպ՝ դուք դնում եք կայուն ապագայի կնիքը:
   Սիրելի՛ ուսուցիչներ, դուք նվիրյալներ եք կրթության ոլորտում և կարողանում են, անկախ առկա մարտահրավերներից ու հոգսերից, սփռել լույս դեպի գիտելիքը, վարակել երեխաներին գիտելիքը սիրելու և արժևորելու ձեր սիրով , դուք եք բացում երեխաների մտքի հորիզոնները, վառում նրանց երևակայությունը, սովորեցնում ճախրել, երազել, նպատակներ սահմանել և հասնել դրանց:
   Այսօր սահմանը քաջաբար պահում են ձեր կրթած պատանիները, գիտության ոլորտները նվաճում են ձեր կրթած սաները, կյանքի տարբեր բնագավառներում խիզախում են ձեր կրթած աշակերտները և այսպես շարունակ:
   Ուրեմն նորից ու նորից շնորհավոր ձեր մասնագիտական տոնը, շարունակե՛ք ձեր անսպառ երևակայությամբ և անդուլ աշխատանքով, ձեր մտքի անծիր թռիչքով և անզիջում վճռականությամբ կրթել, դաստիարակել, ձևավորել այս սերնդին ևս՝ հանուն մեր պետության բարօրության և վաղվա լուսավոր օրվա:
   Ցանկանում եմ ձեզ տոկունություն և լավատեսություն,կամք և եռանդ ձեր շնորհակալ և պատասխանատու աշխատանքում: