Վայոց ձորի մարզպետի աշխատակազմ

   Տարեցների միջազգային օրվա շրջանակներում, ձևավորված գեղեցիկ ավանդույթի համաձայն, ՀՀ Վայոց ձորի մարզպետ Կոլյա Միքաելյանը մարզպետի աշխատակազմի ներկայացուցիչների հետ այցելել է մարզի ամենաերկարակյաց բնակիչներին՝ 103-ամյա Խաչանուշ Մովսիսյանին /գյուղ Արփի/, 102-ամյա Անազ Նավասարդյանին /գյուղ Ագարակաձոր/ , 100-ամյա Զաբել Ամրգուլյանին /գյուղ Կարմրաշեն/։ Մարզի չորրորդ երկարակյաց բնակիչը՝ 102-ամյա Եվգենյա Սարգսյանը (գ․ Գողթանիկ), այժմ մարզում չի բնակվում։
   ՀՀ Վայոց ձորի մարզպետ Կոլյա Միքաելյանը զրուցեց տարեցների ընտանիքների անդամների հետ, հետաքրքրվեց նրանց կյանքի անցած ճանապարհով։ Ընտանիքի անդամները հյուրերին ներկայացրին տարեցների կյանքից հետաքրքիր դրվագներ, հիշարժան իրադարձություններ։
   Կոլյա Միքաելյանն առողջություն մաղթեց տարեցներին և կարևորեց այն հոգատարությունն ու ջերմությունը, որով շրջապատված են նրանք՝ միաժամանակ նշելով, որ տարեցներն ավանդաբար եղել և մնում են հայկական ընտանիքի պահապանն ու ուժը, սերունդներին լավագույն արժեքների և հարուստ կենսափորձի փոխանցողները:
   ՀՀ Վայոց ձորի մարզպետի աշխատակազմի կողմից ավագ սերնդի ներկայացուցիչներն ստացան դրամական աջակցություն։