Վայոց ձորի մարզպետի աշխատակազմ

   Արենի համայնքի նախաձեռնությամբ ս/թ հունիսի 29-ին Արենի համայնքի Ռինդ բնակավայրում անց է կացվելու <<Տադի շորվա>> խորագրով մշակութային փառատոն:
   Փառատոնը կազմակերպվում է Արենիի համայնքապետարանի կողմից իրականացվող Արենիում զբոսաշրջության զարգացման հայեցակարգի ձեւավորում պորտֆելային մոտեցմամբ ծրագրի շրջանակներում: Ծրագիրն իրականացվում է Հայաստանում ՄԱԶԾ գրասենյակի համագործակցությամբ Եվրամիության ֆինանասավորմամբ:
   <<Տադի շորվա>> փառատոնի ընթացքում ներկայացվելու են Արենի համայնքի 9 բնակավայրերից գրառված եւ վեր հանված հայկական ավանդական կերակրատեսակներ, ավանդույթներ, խաղեր, երգեր եւ պարեր, որոնք փոխանցվել են սերնդեսերունդ:Փառատոնի նպատակներից մեկը հայկական խոհանոցի ավանդույթները, պատմությունը եւ մշակույթը պահպանելն ու հանրայնացնելն է։
   Փառատոնի մեկնարկը տրվելու է հունիսի 29-ին՝ ժամը 16:00-ին, Ռինդ բնակավայրի կենտրոնական հրապարակում: Ի դեպ, հունիսի 28-ին Ռինդում նախատեսվում է նաեւ «Ժայռափոր» եկեղեցու արահետի բացման արարողություն:
   Փառատոնի ընթացքում նախատեսվում են մի շարք միջոցառումներ՝

• Խոհարարական հմտությունների ցուցադրություն
• Արհեստագործական եւ արվեստի գործերի ցուցադրություն
• Լավաշի թխման ցուցադրություն
• Գաթայի թխման ցուցադրություն
• Տեղական ավանդական ուտեստների համտես
• Գինու համտես
• Պանրի համտես
• Արենի համայնքին հատուկ ավանդական խաղերի կազմակերպում, ցուցադրություն
• Տեղի երգի ու պարի խմբերի կենդանի կատարումներ
• Հրավիրված երգիչների եւ խմբերի կենդանի կատարումներ

  Այսպիսով, հունիսի 29-ին դեպի Ռինդ, դեպի <<Տադի շորվա>> խորագրով մշակութային փառատոն: