Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ Վայոց ձորի մարզպետ Կոլյա Միքաելյանի շնորհավորական ուղերձը Մայիսի 1-ի՝ Աշխատանքի օրվա առիթով
01.05.2024
Սիրելի՛ հայրենակիցներ․
Ջերմորեն շնորհավորում եմ Մայիսի 1-ի՝ Աշխատանքի և աշխատավորների օրվա կապակցությամբ։
Այն ի սկզբանե խորհրդանշել է աշխատանքային իրավունքների պաշտպանության համար պայքարող աշխատավորների շարժումն ու պահանջատիրությունը, սակայն հետագայում՝ տարբեր ժամանակներում, յուրովի է մեկնաբանվել օրվա իմաստը։ Սակայն մի բան մնացել է անփոփոխ և աներկբա․ աշխատանքն է արժանապատիվ կյանքով ապրելու, ինքնադրսևորվելու և նոր հնարավորություններ ստեղծելու լավագույն միջոցը, կայուն, զարգացող պետություն կառուցելու անվիճելի գրավականը։
Աշխատասիրությունը և աշխատանքի նկատմամբ ակնածանքը հայ ժողովրդի պատմական կենսագրության անբաժանելի մասն են, նրա հոգևոր և ֆիզիկական կարողությունները գնահատելու ցուցիչները։ Եվ բնավ էլ պատահական չէ, որ հայկական բազմադարյա մշակույթն ու գրականությունը հարուստ են աշխատանքն ու աշխատավորին գովերգող ու փառաբանող ստեղծագործություններով։
Աշխատանքը և նրա արդյունքները կենարար բարիք են, իսկ հանրության միասնական ջանքը՝ որպես պետության կառուցման ու ամրապնդման երաշխիք, ուստի եկեք սերնդեսերունդ փոխանցված հրաշալի ավանդույթները պահպանենք և զարգացնենք։
Կրկին շնորհավորում եմ աշխատանքի օրվա առթիվ և մաղթում բոլորին մասնագիտական կարողությունները և լավագույն հմտությունները դրսևորելու, սեփական ներուժը իրացնելու իրական հնարավորություններ։
Թող յուրաքանչյուր անհատ վայելի իր աշխատանքի արդյունքների բերկրանքը, իր ստեղծարար աշխատանքով և ստեղծագործ մտքով շենացնի հայրենիքը, ծառայի պետականաշինության պատվաբեր գործին։
