Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Տեղի ունեցավ ՀՀ Վայոց ձորի մարզխորհրդի չորրորդ նիստը
12.10.2023
Հոկտեմբերի 10-ին ՀՀ Վայոց ձորի մարզպետի աշխատակազմում մարզպետ Արարատ Գրիգորյանի նախագահությամբ տեղի ունեցավ մարզխորհրդի չորրորդ նիստը։
Նիստի օրակարգի հարցը վերաբերում էր Լեռնային Ղարաբաղից բռնի տեղահանված և Վայոց ձորում բնակվող քաղաքացիների խնդիրներին։
Նիստին մասնակցում էին մարզպետի աշխատակազմի համապատասխան վարչությունների պետերը, մարզի ուժային կառույցների ղեկավարները, համայնքների ղեկավարները, ՀՀ ԱՍՀՆ ՄՍԾ տարածքային կենտրոնների տնօրենները։
ՀՀ Վայոց ձորի մարզպետ Արարատ Գրիգորյանն ընդհանուր գծերով ներկայացրեց մինչ օրս մարզում Լեռնային Ղարաբաղից բռնի տեղահանված անձանց խնդիրներին առնչվող աշխատանքների հիմնական ուղղությունները՝ բարձր գնահատելով կարճաժամկետ ծրագրերի լուծման փուլում կատարած աշխատանքները, կարևորելով բոլոր պատասխանատու օղակների՝ շուրջօրյա ռեժիմով աշխատելու, ինչպես նաև Վայքի հաշվառման կայանի ծանրաբեռնված աշխատանքները պատշաճ մակարդակով կազմակերպելու հանգամանքները։
Հիմնական զեկույցով հանդես եկավ առողջապահության և սոցիալական ոլորտի հարցերի վարչության պետ Վասիլ Ասլանյանը՝ հանգամանորեն ներկայացնելով կատարված և առաջիկայում կատարվելիք աշխատանքները։ Այնուհետև Տարածքային կառավարման և տեղական ինքնակառավարման հարցերի վարչության պետ Աղվան Հարությունյանը ներկայացրեց մարզում բռնի տեղահանվածների թվային բաշխվածության պատկերը՝ ըստ համայնքների և բնակավայրերի՝ նշելով, որ թվերը պարբերաբար փոխվում են՝ պայմանավորված միջմարզային և ներմարզային մակարդակով քաղաքացիների շարժով։ՄՍԾ տարածքային կենտրոնների տնօրեններն էլ ներկայացրեցին իրենց իրավասությունների շրջանակի աշխատանքների ընթացիկ վիճակը։
Բազմակողմանի քննարկումներում կարևորվեցին մի քանի առաջնային խնդիրներ, որոնք պետք է դիտարկել միջնաժամկետ ծրագրերի տեսանկյունից՝ կեցավայրերի հարցերի որոշակիացում, մասնավորապես հյուրանոցներից,հյուրատներից դեպի տներ հոսքի ապահովում, տեղահանվածների ինտեգրում, զբաղվածության խնդրի լուծում, դպրոցահասակ երեխաների՝ կրթական համակարգում ընդգրկվածության ապահովում և այլն։
Քննարկումներում նախանշվեցին խնդրո առարկայի վերաբերյալ մարզում երկարաժամկետ ծրագրերի իրականացման որոշ կողմեր, որոնք մանրակրկիտ ուսումնասիրելուց, դիտարկելուց հետո հնարավոր կլինեն կյանքի կոչել։
Վայոց ձորի մարզպետ Արարատ Գրիգորյանը, ամփոփելով նիստը, նշեց, որ այս փուլի աշխատանքների արդյունավետ և նպատակային կազմակերպումը հետագայում կդառնա երկարաժամկետ ծրագրերի կազմման իրատեսական հիմքերից և հաջողության գրավականներից մեկը։
