Վայոց ձորի մարզպետի աշխատակազմ

     Նոյեմբերի 16-ին ՀՀ Վայոց ձորի մարզպետի տեղակալ Դավիթ Սարգսյանը ներկա գտնվեց <Սյունիք-Զարգացում> ՀԿ-ի կողմից իրականացվող <Պտղաբուծության շուկայի զարգացում Վայոց ձորի և Գեղարքունիք մարզերում> ծրագրի փակման միջոցառմանը։

  Ծրագիրը, որն իրականացվել է շվեյցարական HEKS-EPER կազմակերպության օժանդակությամբ, միտված է աջակցել մարզերում գյուղատնտեսության ոլորտի զարգացմանը, զինել մարզի գյուղատնտեսներին արդի գիտելիքներով ու գործիքակազմով, ներկայացնել այն հնարավորությունները, որոնք թույլ կտան գտնել իրենց տեղը շուկայում և դառնալ մրցունակ։

     Ընդգծելով գյուղատնտեսական ոլորտի կարևորությունը ոչ միայն մեր մարզի, այլև երկրի տնտեսության մեջ, որի արդյունքներից կախված է երկրի սոցիալ-քաղաքական կայունությունը, պարենային անվտանգությունը և քաղաքացիների վստահությունը վաղվա օրվա նկատմամբ, մարզպետի տեղակալ Դավիթ Սարգսյանը շնորհակալություն հայտնեց կազմակերպիչներին և բոլոր ներգրավված կողմերին ազգանվեր գործունեության համար, հույս հայտնելով, որ միահամուռ ուժերի շնորհիվ հնարավոր կլինի այդ համագործակցությունը համալրել նոր նախաձեռնություններվ՝ բերելով այն որակապես նոր մակարդակի։

  Ծրագրի շնորհիվ Վայոց ձորի մարզի տարբեր ֆերմերային խմբեր օժանդակություն են ստացել հիմնելու չրանոցներ, սառնարանային տնտեսություններ, կոմերցիոն այգիներ կամ բարելավել ու ընդլայնել արդեն իսկ ստեղծված տնտեսությունները, երկու տնկարանային տնտեսություններ օժանդակություն են ստացել արտադրելու ժամանակակից շուկայի պահանջներին համապատասխան ավանդական և ինտենսիվ պտղատու տնկիներ, հարյուրավոր այգեգործներ մասնակցել են պտղաբուծության վերաբերյալ կարողությունների զարգացման տարբեր միջոցառումների, ինչն անկասկած կարելի է համարել մեծ ձեռքբերում մարզի գյուղատնտեսության զարգացման գործում։