Վայոց ձորի մարզպետի աշխատակազմ

    Սիրելի՛ վայոցձորցիներ,
    Ընդունեք ջերմ ու անկեղծ շնորհավորանքներս՝ Երեխաների իրավունքների պաշտպանության միջազգային օրվա կապակցությամբ:

Մանկությունը յուրաքանչյուր մարդու համար ամենաերջանիկ և ուրախ տարիներն են՝ լեցուն քնքնշությամբ, հոգատարությամբ, բարությամբ ու գեղեցիկ հիշողություններով: Այդ հիշողությունները մշտապես ուղեկցում են մեզ և շատ կարևոր նշանակություն են ունենում ողջ կյանքի համար:

    Ինչպիսին կլինի մեր սերունդների կյանքը՝ պատանեկությունն ու ապագան, մեծապես պայմանավորված է մեր՝ ծնողներիս վերաբերմունքով, որովհետև բոլոր երեխաները կարիք ունեն հոգատարության, սիրո, դաստիարակության և կրթության: Իհարկե, այդ ամենն ապահովելու համար մեր պետությունն ու հասարակությունը անում է առավելագույնը: Բայց որոշիչ դերն այս հարցում պատկանում է ընտանիքին, որտեղ ձևավորվում են երեխայի բնավորությունը, հոգեկան և ֆիզիկական առողջությունը: Երեխաների կյանքում կարևոր դերակատարություն ունեն նաև մեծահասակները՝ տատիկներն ու պապիկները, որոնց խորհուրդներն օգնում են զերծ մնալ տարատեսակ վտանգներից, իսկ նրանց հետ շփումները երեխաներին պարգևում են անհոգ ու երջանիկ պահեր:

    Իմ անկեղծ շնորհակալությունն եմ հայտնում բոլոր նրանց, ովքեր իրենց ներդրումն ունեն երեխաների խնամքի, կրթության ու դաստիարակության գործում և ջանք ու եռանդ չեն խնայում աճող սերնդի համար ապահով ու խաղաղ ապրելու և ներդաշնակ միջավայրում հասակ առնելու պայմաններ ապահովելու գործում:

   Սիրելի՛ ծնողներ, միմյանց նկատմամբ հոգատարություն, երջանկություն, բարեկեցություն ու միություն եմ մաղթում ձեր ընտանիքներին:
Թո՛ղ, կարողանաք միշտ սեր և ուրախություն պարգևել ձեր երեխաներին:

Աստված պահապան բոլորիս ընտանիքներին: