Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետ Արարատ Գրիգորյանը մասնակցել է Արենիի միջնակարգ դպրոցում Արցախյան 44-օրյա պատերազմի զոհերի հիշատակին նվիրված խաչքարի բացման արարողությանը
02.03.2022
Այսօր ՀՀ Վայոց ձորի մարզպետ Արարատ Գրիգորյանը մասնակցել է Արենի համայնքի Արենի բնակավայրի միջնակարգ դպրոցում Արցախյան 44-օրյա պատերազմի զոհերի հիշատակին նվիրված խաչքարի բացման հանդիսավոր արարողությանը:
Միջոցառմանը ներկա էին Արենի համայնքի ղեկավար Հուսիկ Սահակյանը, Վայոց ձորի մարզպետարանի կրթության, մշակույթի և սպորտի վարչության պետ Տատյանա Պոլուդնիցինան, բնակիչներ, դպրոցի աշակերտներ:
Խաչքարը տեղադրվել է դպրոցի ուսուցչական անձնակազմի, աշակերտների և բարերարների համատեղ նախաձեռնությամբ:
Մարզպետ Արարատ Գրիգորյանը, իր խոնարհումը հայտնելով Արցախյան 44-օրյա պատերազմի զոհերի հիշատակին, ընդգծեց զինվորների հիշատակը հավերժացնող կոթողների կառուցման կարևորությունը, որոնք, որպես խոսուն վկաներ, սերունդներին և ողջ աշխարհին պետք է փոխանցեն մեր հերոսների պատմությունը և նրանց գործած սխրանքները։
<Մեր զինվորները գնացին պատերազմ, որպեսզի մենք կարողանանք ապրել խաղաղ երկնքի տակ, արարել, ստեղծագործել, մեր ամենօրյա աշխատանքով հզորացնել յուրահատուկ և անկրկնելի մշակույթ ունեցող մեր երկիրը, որտեղ միահյուսվել է տարբեր սերունդների դարավոր իղձը՝ ունենալ անկախ, խաղաղ և ուժեղ Հայաստան>։
Փա՛ռք մեր հերոսներին, նրանց սխրանքին, փա՛ռք Հայոց բանակին:
