Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Ներմարզային ֆուտբոլային մրցաշարի եզրափակիչ փուլ Վայոց ձորում
10.08.2021
Օգոտոսի 10-ին Գլաձոր համայնքի նորակառույց ֆուտբոլի մարզադաշտում տեղի ունեցավ ներմարզային ֆուտբոլային մրցաշարի եզրափակիչ փուլը, որի արդյունքում պատվավոր տեղեր զբաղեցրած թիմերը պարգևատրվեցին մրցանակներով:
Միջոցառումը կարևոր խթան է հանդիսանում մարզում սպորտի զարգացման, տարբեր համայնքների երեխաների միջև շփման և նոր ընկերության ձեռքբերման համար։
Ներկա էին ՀՀ Վայոց ձորի մարզպետ Արարատ Գրիգորյանը, ՀՖՖ Վայոց ձորի մարզի ներկայացուցիչ Խորեն Հովհաննիսյանը, Գլաձոր համայնքի ղեկավարը, ֆուտբոլասեր բնակիչներ, Հայաստանի երիտասարդական և ազգային հավաքականի ֆուտբոլիստներ՝ Գառնիկ Հովհաննիսյանը, Ալիկ Թադևոսյանը, Նորավանք ֆուտբոլային ակումբի պատանեկան խմբի ղեկավար Արթուր Ոսկանյանը և այլ հյուրեր։
Մրցաշարից հետո մարզպետը դիպլոմներ հանձնեց Վայոց ձորի մարզի ֆուտբոլի պատանեկան առաջնությունում առաջին, երկրորդ և երրորդ տեղեր զբաղեցրած թիմերին։
Մարզպետը, շնորհավորելով կազմակերպիչներին և մարզիկներին այդպիսի գեղեցիկ ֆուտբոլային մրցաշար կազմակերպելու և լավագույնս ներկայանալու համար, իր խոսքում նշեց․
<Այսօր մենք ականատես եղանք, թե ինչպես են մեր պատանիները հաստատուն քայլերով շարժվում դեպի իրենց նպատակ: Այս մրցաշարը կարևորագույն հիմնաքար է, որը նրանց նախապատրաստում է հաջորդ, առավել հաղթական խաղերի:
Սիրելի մասնակիցներ, ձեր ուժերի սահմաններում է օգտագործել այդ հնարավորությունը՝ վերածելով պարտությունները հաղթանակների, իսկ հաղթանակները՝ նոր ձեռքբերումների:
Այսօր յուրաքանչյուրդ իր հետ տանում է նշանակալի ձեռքբերում, քանի որ մրցաշարը հնարավորություն է ընձեռում գիտակցել սեփական թույլ կողմերը, աշխատանք տանել այդ թերությունները շտկելու ուղղությամբ, սովորել թույլ տրված սխալներից և վերածել դրանք առավելությունների:
Վստահ եմ, որ այսօր ձեր մեջ կան մարդիկ, ովքեր ապագայում կարող են բարձրացնել մեր մարզի անունը ոչ միայն համահայկական մրցաշարերում, այլև միջազգային հարթակում:
Եվս մեկ անգամ շնորհակալ եմ կազմակերպիչներին կատարված աշխատանքի համար, որը ոչ միայն նոր շունչ է հաղորդում մարզի ֆուտբոլային ոլորտին՝ բերելով այն որակապես նոր մակարդակի, այլև միավորում է մեզ՝ ջնջելով սահմանը մասնակիցների և հանդիսատեսի միջև՝ վառ և դրական հույզեր պարգևելով բոլորիս>:
