Վայոց ձորի մարզպետի աշխատակազմ

 Սիրելի' հայրենակիցներ,
Այսօր նշում ենք Հանրապետության տոնը՝ Հայաստանի Առաջին Հանրապետության հիմնադրման 103-րդ տարեդարձը:

   1918թ. Սարդարապատի, Բաշ-Ապարանի, Ղարաքիլիսայի հաղթական հերոսամարտերը բեկումնային դարձան հայոց հաղթական պատմության կերտման ճանապարհին: Մայիսյան հերոսամարտերը փրկեցին հայոց երկիրը կործանումից, իսկ հայ ժողովրդին հաղորդեցին հույս և վստահություն՝ սեփական ուժերի և ապագայի նկատմամբ։ Այս պատերազմներում հայ ժողովրդը պայքարում էր հայրենիքի, հայ մնալու և ազգային ինքնության պահպանման համար, ուստի թշնամին ի զորու չեղավ հաղթանակ տանել և ստիպված ճանաչեց Հայաստանի անկախությունը:

   1918թ. մայիսի 28-ին Հայոց ազգային խորհուրդը հայտարարեց անկախ Հայաստանի Հանրապետության վերականգնման օր: Հայ ժողովրդի միասնականության և անկոտրում ոգու շնորհիվ իրականություն դարձավ անկախ և ինքնիշխան պետականություն ունենալու հայոց դարավոր իղձը:
Չնայած Առաջին Հանրապետության գոյատևման կարճ ժամանակահատվածին, այն կարողացավ լուրջ նախադրյալներ ստեղծել երկրի զարգացման համար, իսկ հայ ժողովրդին հաղորդեց հույս և վստահություն՝ ապագայի և սեփական ուժերի նկատմամբ:

    Այդ վստահության և միասնականության շնորհիվ էր, որ հիմք ձևավորվեց մեր նոր պետականության՝ Հայաստանի Հանրապետության ստեղծման և ամրապնդման համար։

    Հայաստանը եղել է և միշտ կլինի հայ ժողովրդի երազանքների և նպատակների համախմբման կենտրոն և յուրաքանչյուր քաղաքացու, յուրաքանչյուր հայի համար ապրելու լավագույն հանգրվանը: Մենք պետք է մեր աշխատանքով, միասնությամբ և հայրենասիրությամբ պաշտպանենք և ամրապնդենք այսքան դժվարությամբ ձեռք բերված, բայց այսքան սիրելի մեր հայրենիքը, որի համար անմնացորդ նվիրումով պայքարեցին մեր քաջ եղբայրները, Արցախյան հերոսամարտերի ընթացքում:

    Մեր պարտականությունն է անցյալի և ապագայի նկատմամբ՝ քաջ գիտակցել, որ հայրենիքը առավել քան երբևէ ունի մեր համախմբվածության կարիքը, որի շնորհիվ, մեր անմնացորդ հայրենասիրությամբ և աշխատանքով մենք դեռ պետք է կերտենք մեր պատմությունը միայն հաղթական էջերով:

Հարգելի՛ վայոցձորցիներ
Շնորհավորում եմ Հայաստանի առաջին Հանրապետության տոնի կապակցությամբ: Մաղթում եմ բոլորիս խաղաղություն, ամուր պետականություն և անկոտրում հավատ մեր հայրենիքի և նրա ապագայի նկատմամբ: