Վայոց ձորի մարզպետի աշխատակազմ

  Աշխատանքային այցով Վայոց ձորի մարզում էր ՀՀ առողջապահության նախարարի պաշտոնակատար Անահիտ Ավանեսյանը:  ՀՀ Վայոց ձորի մարզպետ Արարատ Գրիգորյանի հետ հանդիպման ընթացքում քննարկվել են մարզի բուժհաստատություններում կորոնավիրուսային հիվանդության դեմ իրականացվող պատվաստումների ընթացքը և առողջապահության ոլորտին վերաբերող մի շարք հարցեր: Այնուհետև մարզպետարանի նիստերի դահլիճում տեղի է ունեցել հանդիպում մարզի առողջապահական հաստատությունների ղեկավարների հետ:

     Մարզպետ Արարատ Գրիգորյանը, ողջունելով նախարարի այցը Վայոց ձորի մարզ, ընդգծեց մարզի առողջապահության ոլորտի պատասխանատուների ներգրավվածությամբ նմանօրինակ հանդիպման կարևորությունը, որտեղ վերջիններս կարող են իրենց հուզող հարցերն ուղղել առողջապահության նախարարին:

    Մարզպետը կարևորեց մարզային իշխանությունների և նախարարության  համատեղ աշխատանքը կառավարության կողմից որդեգրած քաղաքականության իրականացման գործում, որի արդյունքում պետք է հաղթահարվեն համավարակի մարտահրավերները:

     Հանդիպման շրջանակներում մարզպետ Արարատ Գրիգորյանը և նախարարի պաշտոնակատար Անահիտ Ավանեսյանն այցելել են Եղեգնաձորի բժշկական կենտրոն, որտեղ ներկա են գտնվել ռենտգեն բաժանմունքի բացման արարողությանը:

    Ընթացիկ աշխատանքներին ծանոթանալու նպատակով այցելել են նաև Վահագն Ագլամիշյանի անվան Եղեգնաձորի մարզային ակնաբուժական կենտրոն և <Արենի> առողջության առաջնային պահպանման կենտրոն: