Վայոց ձորի մարզպետի աշխատակազմ

 Այսօր Վայոց ձորի մարզի Եղեգիս համայնքի Շատին բնակավայրի միջնակարգ դպրոցում կազմակերպվել էր միջոցառում նվիրված Արցախյան երկրորդ պատերազմում նահատակված վայոցձորցի մերօրյա հերոս Դավիթ Հովհաննիսյանին, ով սովորել և ավարտել է տեղի դպրոցը:

Միջոցառմանը ներկա էին ՀՀ Վայոց ձորի մարզպետարանի կրթության, մշակույթի և սպորտի վարչության պետ Արփիար Ղազարյանը, մարզպետի տեղակալի օգնական Աշխեն Հայրապետյանը, Եղեգիս համայնքի ղեկավար Արթուր Ստեփանյանը, զոհված հերոսի ծնողները, դպրոցի ուսուցչական կազմը և այլ հյուրեր:
Ներկաները մեկ րոպե լռությամբ հարգեցին պատերազմական գործողությունների ընթացքում իրենց կյանքը հանուն հայրենիքի զոհաբերած բոլոր նահատակների հիշատակը:

Դպրոցականների կատարմամբ ներկայացվեց հերոսի կարճ, բայց բովանդակալից կենսագրությունը, հնչեցին հայրենասիրական երգեր, ասմունք, երախտիքի խոսքեր:

Ավագ լեյտենանտ Դավիթ Արայի Հովհաննիսյանը ծնվել է Եղեգիս համայնքի Շատին բնակավայրում 1995 թվականի օգոստոսի 1-ին։
Ավարտելով Հայաստանի ազգային ագրարային համալսարանը՝ ծառայության է անցել Սիսիանում: Մասնակցել է Ջրականի և Հադրութի թեժ մարտերին:
Դավիթը հերոսաբար զոհվել է 11.10.2020 թվականին` պաշտպանելով հայրենիքը։

Արփիար Ղազարյանը մարզպետ Արարատ Գրիգորյանի անունից ողջույնի խոսք հղեց ներկաներին և շնորհակալություն հայտնեց միջոցառման կազմակերպիչներին: Իր խոսքում նշեց, որ Դավիթ Հովհհանիսյանը աչքի էր ընկնում ոչ միայն իր խիզախությամբ, այլ նաև աշխատասիրությամբ, փայլուն գիտելիքներով, մասնակցել էր բազմաթիվ մրցույթների, ինտելեկտուալ խաղերի և պատվով ներկայացել: Իմ խոնարհումն եմ հայտնում մեր բոլոր զոհված հերոսների հիշատակին:

Հավերժ փառք, հանուն հայրենիքի անմահացած մեր հերոսներին ...