Վայոց ձորի մարզպետի աշխատակազմ

 Հայաստանի Հանրապետության համար այս դժվարագույն պահին (պատերազմ, համավարակ) Վայոց ձոր մարզի տարեցներն առանց հոգածության և ուշադրության չմնացին: Այսօր ՀՀ Վայոց ձորի մարզպետ Արարատ Գրիգորյանը, մարզպետարանի առողջապահության և սոցիալական ապահովության վարչության պետ Վասիլ Ասլանյանը, Գլաձոր համայնքի սոցիալական աշխատող Նաիրա Ստեփանյանը Տարեցների օրվա առիթով այցելեցին մարզում ապրող հարյուրամյակը բոլորած տարեցներին:
 Մարզպետը հանդիպեց Վայոց ձորի մարզի մեկ դարը բոլորած երեք տարեցներին, զրուցեց նրան հետ, հետաքրքրվեց նրանց առօրյայով: Մարզպետի կողմից հոգածության խոսքեր հնչեցին և ՀՀ Վայոց ձորի մարզպետարանի ու Գլաձորի համայնքապետարանի կողմից աջակցություն տրվեց, ֆինանսի տեսքով:
Նշենք, որ  երեք տարեցներն էլ Գլաձոր համայնքի բնակիչներ են՝

-Քյարամ Գաբրիելի Սարգսյանը ծնվել է Գլաձոր համայնքի Գլաձոր բնակավայրում, 1920 թվականի դեկտեմբերի 22-ին: Նա Հայրենական Մեծ Պատերազմի մասնակից է: Աշխատել է Եղեգնաձորի <Գյուղտեխնիկա> միավորումում որպես եռակցող:

-Սիրուշ Սումբատի Մարգարյանը նույնպես Գլաձորի բնակիչ է, ծնվել է 1905 թվականի մայիսի 3-ին: Նա Հայաստանի Հանրապետության ամենատարեց բնակիչն է, խնամել ու մեծացրել է 8 երեխա:

-Գեղեցիկ Սարգիսի Բաբայանը ծնվել է 1919 թվականի հունիսի 1-ին, բնակվում է Գլաձոր համայնքի Վերնաշեն գյուղում: Գեղեցիկ Բաբայանը բազմազավակ մայր է:
Հավելենք, որ 1993 թվականին ՄԱԿ-ը հոկտեմբերի 1-ը հայտարարել է որպես <Տարեցների միջազգային օր>: