Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Գործակարգավարական առաջին խորհրդակցությունը ՀՀ Վայոց ձորի մարզպետ Արարատ Գրիգորյանի մոտ
01.11.2019
Այսօր՝ նոյեմբերի 1-ին, ՀՀ Վայոց ձորի նորանշանակ մարզպետ Արարատ Գրիգորյանի մոտ կայացավ գործակարգավարական առաջին խորհրդակցությունը, որին մասնակցում էին մարզպետի խորհրդականները, օգնականները, մարզպետարանի գլխավոր քարտուղարը և ստորաբաժանումների ղեկավարները:
Մինչ խորհրդակցություն սկսելը, նորանշանակ մարզպետը նախ տեղեկություն ներկայացրեց մինչ մարզպետի պաշտոնը ստանձնելն իր աշխատանքային գործունեության մասին: Այնուհետ խոսեց մարզպետարանում իրականացվող աշխատանքների գնահատման վերաբերյալ իր մոտեցումների, հանձնարարությունների կատարման նկատմամբ աշխատակիցների կողմից բարձր պատասխանատվության դրսևորման, աշխատանքների վերաբերյալ հաշվետվողականության, կարգապահական ներքին կարգ ու կանոնի խստիվ պահպանման մասին:
Որպես առաջին աշխատանքային խորհրդակցություն, ճանաչողության ապահովման համար, ստորաբաժանումների ղեկավարները հակիրճ տեղեկություն ներկայացրին իրենց ղեկավարած ստորաբաժանման կազմի, գործառույթների, կատարած աշխատանքների և առաջիկա անելիքների մասին:
Իրենց գործառույթները ներկայացրին նաև մարզպետի խորհրդականները և օգնականները: Մարզպետարանի գլխավոր քարտուղարը ներկայացրեց իր համակարգման ոլորտները և աշխատանքների ղեկավարման գործառույթը:
Ամփոփելով խորհրդակցությունը, մարզպետը հստակ հանձնարարություններ տվեց յուրաքանչյուր ստորաբաժանման ղեկավարի, կարևորեց աշխատանքների կատարողական որակը և կատարման համար նշված ժամկետների պահպանումը: Մարզպետ Արարատ Գրիգորյանը նշեց, որ այսուհետ յուրաքանչյուր աշխատանքային շաբաթվա ընթացքում լինելու է գործակարգավարական երկու խորհրդակցություն, երկուշաբթի՝ աշխատանքների քննարկման և հանձնարարությունների տրման համար, իսկ ուրբաթ՝ շաբաթվա ընթացքում կատարված աշխատանքների վերաբերյալ քննարկումների և հաշվետվությունների ներկայացման համար:
Խորհրդակցության ավարտին մարզպետ Արարատ Գրիգորյանը բոլորին մաղթեց արդյունավետ աշխատանք:
