Վայոց ձորի մարզպետի աշխատակազմ

 Այսօր ՀՀ Վայոց ձորի մարզպետ Տրդատ Սարգսյանի մասնակցությամբ տեղի ունեցավ ՀՀ Վայոց ձորի մարզի հաշմանդամություն ունեցող անձանց հարցերով զբաղվող մարզային հանձնաժողովի հերթական նիստը:
Օրակարգում ընդգրկված էին հետևյալ հարցերը.
ա) հավաստագրերի հիման վրա աջակցող պարագաների տրամադրման գործընթացը կազմակերպելու վերաբերյալ,
բ) հաշմանդամություն ունեցող անձանց զբաղվածության խնդիրները և զբաղվածության պետական ծրագրերը,
գ) զինհաշմանդամների սոցիալական երաշխիքները,
դ) ՀՀ Վայոց ձորի մարզի հաշմանդամություն ունեցող անձնաց հիմնախնդիրները, ռազմավարական լուծումները,
ե) քննարկումներ:
Հավաստագրերի հիման վրա աջակցող պարագաների տրամադրման գործընթացը կազմակերպելու վերաբերյալ զեկոցումով հանդես եկավ մարզպետարանի աշխատակազմի առողջապահության և սոցիալական ապահովության վարչության առաջատար մասնագետ Ցողիկ Բաբայանը:
Հաշմանդամություն ունեցող անձանց զբաղվածության խնդիրները և զբաղվածության պետական ծրագրերը ներկայացրեց Զբաղվածության պետական ծառայության Եղեգնաձորի տարածքային կենտրոնի գլխավոր մասնագետ Սամվել Ավետիսյանը:
Զինհաշմանդամների համար սահմանված սոցիալական երաշխիքների մասին խոսեց մարզպետարանի Զորահավաքային նախապատրաստության բաժնի պետ Վանիկ Խուդավերդյանը: Մարզպետի տեղակալ Նանե Ասատրյանը խոսեց մարզի հաշմանդամություն ունեցող անձնաց հիմնախնդիրների մասին և նախանշեց դրանց լուծման ռազմավարական քայլերը և իրականացնելու ուղիները: Ն. Ասատրյանը նշեց, որ անհրաժեշտ է կազմել հաշմադամություն ունեցող անձանց սոցիալական խնդիրների քարտեզը:
Քննարկման ժամանակ խոսվեց հաշմանդամների զբաղվածության ծրագրերի մասին: Ներկաները հանդես եկան տարբեր առաջարկներով:
Մարզպետ Տրդատ Սարգսյանը կարևորեց կառավարության համակարգված աշխատանքը և  հստակ մոտեցումը հաշմանդամների խնդիրների լուծման գործընթացին:  Համոզմունք հայտնեց, որ քայլ առ քայլ լուծվելու են հասարակական կյանքին հաշմանդամություն ունեցող անձանց ինտեգրման խնդիրները: Նա պատրաստակամություն հայտնեց՝ մարզպետարանում աշխատանքի ընդունել հաշմանդամություն ունեցող անձի, նրա համար  աշխատասենյակ ապահովելով շենքի առաջին հարկում:  Տ. Սարգսյանը խոսեց առաջիկայում հաշմանդամների վերականգնողական հանրապետական կենտրոնի ներկայացուցիչների մարզ կատարելիք այցի և, նրանց հետ համագործակցության շրջանակում, Վայոց ձորի մարզում ապրող հաշմանդամների վերականգնողական բուժումները կազմակերպելու գործընթացի մասին:
Ամփոփիչ խոսքում մարզպետ Տ. Սարգսյանը հանձնարարեց հաջորդ նիստին ապահովել նաև համայնքապետարանների սոցիալական հարցերով մասնագետների մասնակցությունը, որպեսզի նրանք ներկայացնեն այդ ուղղությամբ համայնքներում կատարվող աշխատանքները: