Վայոց ձորի մարզպետի աշխատակազմ

 Այսօր ՀՀ Վայոց ձորի մարզպետ Հարություն Սարգսյանի մոտ կայացավ գործակարգավարական հերթական խորհրդակցությունը, որին մասնակցում էին մարզպետի տեղակալները, խորհրդականը, մարզպետարանի աշխատակազմի և ստորաբաժանումների ղեկավարները:
Մարզի ղեկավարը խորհրդակցության սկզբում նշեց, որ ստեղծված ներքաղաքական իրավիճակի պարագայում հարկ է պահպանել քաղաքական չեզոքություն, աշխատել բնականոն ռիթմով, լինել հանդուրժող ու պատշաճ ձևով իրականացնել առօրյա աշխատանքային պարտականությունները:
Մարզպետ Հ. Սարգսյանը հանձնարարեց մարզպետարանի աշխատակազմի ֆինանսական և սոցիալ-տնտեսական զարգացման վարչությանը, ուշադրություն կենտրոնում պահել համայնքների եկամուտների և ծախսերի համապատասխանության խնդիրը, հետևել համայնքների սեփական եկամուտների հավաքագրմանը և իրականացվող ծախսերին` կատարելով դրանց ամենօրյա վերլուծություն:
Խորհրդակցության ժամանակ անդրադարձ կատարվեց մարզում ընթացող գարնանացանի աշխատանքներին: Մարզի ղեկավարը հանձնարարեց պարբերաբար տեղակատվություն ներկայացնել տիրող իրավիճակի մասին, զբաղվել դիզվառելանյութի և սերմացուի ներկրման ու բաշխման խնդիրներով, ինչպես նաև պատշաճ ձևով իրականացնել անասնաբուժական միջոցառումները մարզում:
Խորհրդակցության ընթացքում մարզպետարանի աշխատակազմի քաղաքաշինության վարչության պետին հանձնարարվեց Համաշխարհային Բանկի կողմից ֆինանսավորվող <<Հիվանդությունների կանխարգելում և վերահսկում>> վարկային ծրագրի շրջանակում Եղեգնաձոր քաղաքում բժշկական կենտրոնի կառուցվելիք բժշկական նոր կենտրոնի կառուցման համար անհրաժեշտ հողհատկացման ընթացքին:
Խորհրդակցության ընթացքում ներկայացվեց մայիսյան հերոսամարտերին նվիրված տոնական միջոցառումների կազմակերպչական ընթացքը:
Մարզպետարանի կրթության, մշակույթի և սպորտի վարչությանը հանձնարարվեց հետևել մարզի հանրակրթական հաստատություններում բաց թողնված դասերի լրացման ընթացքին:
Խորհրդակցության ավարտին մարզպետ Հ. Սարգսյանը ստորաբաժանումների ղեկավարներին համապատասխան հանձնարարություններ տվեց, ուղղված նրանց կողմից համակարգվող ոլորտների խնդիրների լուծմանը: