Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Տարեվերջյան հաշվետու համերգ Վայքի Խ. Ներսիսյանի անվան արվեստի դպրոցում
16.06.2017
Երեկ Վայքի Խաչատուր Ներսիսյանի անվան արվեստի դպրոցում, մասնակցությամբ ՀՀ Վայոց ձորի մարզպետարանի աշխատակազմի կրթության, մշակույթի և սպորտի վարչության պետ Արփիար Ղազարյանի, տեղի ունեցավ դպրոցի սաների տարեվերջյան հաշվետու համերգը:
Մինչ համերգը ներկաները մասնակցեցին արվեստի դպրոցի նկարչական բաժնի սաների աշխատանքների ցուցահանդեսի բացմանը, որը տեղի ունեցավ դպրոցի գեղարվեստի բաժնի ցուցասրահում:
Համերգի ընթացքում դպրոցի սաները հանդես եկան տարբեր ժանրերի երաժշտական կատարումներով: Ներկայացվեց դասական գործեր, հայկական ժողովրդական և ազգագրական երգեր, ինչպես նաև ազգային նվագարաններով (դուդուկ, շվի, քանոն, դհոլ) կատարումներ: Համերգն ավարտվեց դպրոցի ուսուցիչների երգչախմբային կատարումով:
Համերգի ավարտին ներկաներին ողջունեց, իսկ դպրոցի սաներին իրենց գեղեցիկ կատարումների համար շնորհակալություն հայտնեց դպրոցի նորանշանակ տնօրեն Հասմիկ Առաքելյանը: Երիտասարդ տնօրինուհին ներկայացրեց տարվա ընթացքում իրենց սաների ուժերով կազմակերպված մշակութային միջոցառումների մասին հակիրճ տեղեկատվություն և նշեց, որ միջոցառումներին մասնակցել են դպրոցի բոլոր սաները՝ երաժշտական բաժինների 112 և նկարչական բաժնի 28 աշակերտները: Ներկաներին ողջունեց նաև ՀՀ Վայոց ձորի մարզպետարանի աշխատակազմի կրթության, մշակույթի և սպորտի վարչության պետ Արփիար Ղազարյանը: Սրտի ու շնորհակալանքի խոսք ասաց դպրոցի վոկալ բաժնի երկարամյա մանկավարժ Գենիկ Գասպարյանը:
Փոխադարձ այցելությամբ համերգին հյուրընկալվել էին Եղեգնաձորի մանկական երաժշտական դպրոցի ներկայացուցիչները, դպրոցի տնօրենի պաշտոնակատար Արթուր Կարապետյանի գլխավորությամբ:
Համերգին ներկա էին ՀՀ Վայոց ձորի մարզպետարանի այլ պաշտոնյաներ, Վայքի համայնքապետարանի ներկայացուցիչներ, ծնողներ, հյուրեր և հասարակայնության արվեստասեր անդամներ:
Մեզ մնում է հաջողություններ մաղթել արվեստի դպրոցի համերաշխ կոլեկտիվին և շնորհալի սաներին:
