Վայոց ձորի մարզպետի աշխատակազմ

  Երեկ Եղեգնաձորի մանկական երաժշտական դպրոցի Ֆիլիպ Բալոյանի անվան համերգասրահում ՀՀ Վայոց ձորի մարզպետի տեղակալ Մելս Հարությունյանի մասնակցությամբ տեղի ունեցավ դպրոցի սաների տարեվերջյան հաշվետու համերգը: Համերգին ներկա էին մարզպետարանի աշխատակազմի կրթության, մշակույթի և սպորտի վարչության պետ Արփիար Ղազարյանը, վարչության գլխավոր մասնագետ Աղասի Հովհաննիսյանը, մարզպետարանի աշխատակազմի ՏՀԿ բաժնի պետ Սոնա Մարգարյանը, ծնողներ, հյուրեր: Եղեգնաձորի մանկական երաժշտական դպրոցի սաների կատարումներն ունկնդրելու էր եկել նաև Վայքի արվեստի դպրոցի տնօրեն Հասմիկ Առաքելյանը:
Ներկայացվեցին հայ, ռուս և արտասահմանյան դասականների գործեր: Երաժշտական դպրոցի սաները հանդես եկան գործիքային, խմբերգային և երգային կատարումներով:
Համերգային ծրագրում ելույթ ունեցան <<Երգող Հայաստան>> հանրապետական մանկապատանեկան երգչախմբերի մրցույթի բազմակի մրցանակակիր Եղեգնաձորի երաժշտական դպրոցի մանկական երգչախումբը (ղեկավար` Է. Հակոբյան, կոնցերտմայստեր` Մ. Մանուկյան), Գյումրիի <<Վերածնունդ>> 9-րդ միջազգային մրցույթ փառատոնի առաջին և երկրորդ կարգի դափնեկիրներ և դպիլոմակիրներ:
Եղեգնաձորի երաժշտական դպրոցի սաներին դաշնամուրային կատարումով ողջունեց Վայքի Խաչատուր Ներսիսյանի անվան արվեստի դպրոցի դաշնամուրային բաժնի 5-րդ դասարանի աշակերտուհի Լիլիթ Ազիզյանը (դասատու Հ. Առաքելյան):
Միջոցառման ավարտին համերգի մասնակիցներին ողջունեցին և շնորհակալական խոսք ասացին մարզպետի տեղակալ Մելս Հարությունյանը, երաժշտական դպրոցի տնօրենի պաշտոնակատար Արթուր Կարապետյանը:
Գյումրիի <<Վերածնունդ>> 9-րդ միջազգային մրցույթի մասնակցության ապահովման և մրցանակների արժանանալու համար պատվոգրերի արժանացան դպրոցի նախկին տնօրեն Իրինա Շահինյանը, ֆլեյտայի ուսուցիչ Հեղինար Հարությունյանը, մանկական երգչախմբի ղեկավար Էլեոնորա Հակոբյանը և մի խումբ աշակերտներ:
Մենք նույնպես շնորհավորում ենք մրցանակակիր աշակերտներին և մաղթում նորանոր բեմեր: