Վայոց ձորի մարզպետի աշխատակազմ

 Այսօր ՀՀ Վայոց ձորի մարզպետ Հարություն Սարգսյանն անցկացրեց գործակարգավարական հերթական խորհրդակցությունը, մասնակցությամբ՝ մարզպետի տեղակալների, մարզպետի խորհրդականի, մարզպետարանի աշխատակազմի ղեկավարի և աշխատակազմի ստորաբաժանումների պետերի:
Նախորդ շաբաթվա ընթացքում իրենց ղեկավարած ստորաբաժանումներում իրականացված աշխատանքների վերաբերյալ հակիրճ հաղորդումներով հանդես եկան աշխատակազմի վարչությունների և բաժինների ղեկավարները, որոնք ներկայացրին նաև ընթացիկ շաբաթվա մեջ իրականացվելիք աշխատանքները:
Խորհրդակցությանը քննարկվեցին սպասվելիք շինարարական աշխատանքներին, համայնքներում կատարվող շինարարական աշխատանքների իրականացման նպատակով համայնքների ղեկավարների կողմից տրվող շինթույտվություններին, գյուղացիական տնտեսությունների կողմից ձեռք բերված աշնանացան սերմացուի պարտքերի վերադարձման ժամկետներին, գյուղտեխնիկայի և գյուղգործիքների հաշվառմանը, մարզում առկա անասնագլխաքանակի հաշվառման արդյունքներին, հանրակրթական հաստատությունների գործադիր տնօրենների ընտրություններին, դպրոցական առարկայական օլիմպիադաների կազմակերպման աշխատանքներին, համայնքներում հողօգտագործման ոլորտի խնդիրներին, տեղական տուրքերի հավաքագրման գործընթացին, արևային կայանների կառուցմանն առնչվող հարցեր:
Մարզպետ Հ. Սարգսյանը հետաքրքրվեց մարզային զարգացման ռազմավարության շրջանակում ներդրումային ծրագրերի,ինչպես նաև մարզում ոչխարաբուծության զարգացման ծրագրերի համար մարզի արոտավայրերի քարտեզագրման աշխատանքներով:
Նշեց, որ նախատեսվում է մարզում ստեղծել գյուղտեխնիկայի պարկեր, որի համար անհարաժեշտ է մանրամասնորեն հաշվառել համայնքներում առկա գյուղտեխնիկան:
Մարզպետը հանձնարարեց աշխատակազմի կրթության, մշակույթի և սպորտի վարչության պետին՝ հետևողական լինել,  որպեսզի ուսումնական տարվա ընթացքում հանրակրթական հաստատություններում կազմակերվեն տարբեր բնույթի միջոցառումներ՝ մշակութային, մարզական մրցույթներ, բանակին նվիրված և հայրենասիրական թեմաներով շարադրությունների մրցույթներ և լավագույններին խրախուսել: Նա ասաց, որ Հայոց բանակի 25 ամյակի կապակցությամբ տարին պիտի համարել Բանակին նվիրված տարի և ողջ տարվա ընթացքում կազմակերպել վերը նշված միջոցառումները:
Վերջում մարզի ղեկավարը մարզպետարանի աշխատակազմի ստորաբաժանումների ղեկավարներին տվեց համապատասխան հանձնարարականներ՝ ուղղված նրանց կողմից ղեկավարվող ոլորտների խնդիրների լուծմանը: