Վայոց ձորի մարզպետի աշխատակազմ

  Այսօր ՀՀ Վայոց ձորի մարզպետ Հարություն Սարգսյանի մոտ կայացավ ընթացիկ տարվա գործակարգավարական երկրորդ խորհրդակցությունը, որին մասնակցում էին մարզպետի տեղակալները, մարզպետի խորհրդականը, մարզպետարանի աշխատակազմի ղեկավարը և աշխատակազմի ստորաբաժանումների պետերը:
Մարզպետարանի աշխատակազմի վարչությունների և բաժինների ղեկավարները հանդես եկան նախորդ շաբաթվա ընթացքում իրենց ղեկավարած ստորաբաժանումներում իրականացված աշխատանքների վերաբերյալ հակիրճ հաղորդումներով, ինչպես նաև ներկայացրին ընթացիկ շաբաթվա մեջ իրականացվելիք աշխատանքները:
Խորհրդակցությանը քննարկվեցին սպասվելիք շինարարական աշխատանքներին, ճանապարհների ձմեռային պահպանության աշխատանքներին, գյուղացիական տնտեսությունների կողմից ձեռք բերված աշնանացան սերմացուի պարտքերի վերադարձման ընթացքին, կանխատեսվող ցանքատարածություններին, գյուղատնտեսական մեքենա-տրակտորային կայանների ստեղծմանը, միջնաժամկետ ծախսային ծրագրերի կազման և ժամկետներին, առողջապահական, կրթական, հողօգտագործման ոլորտների խնդիրներին առնչվող հարցեր:
Մարզպետ Հ. Սարգսյանը հետաքրքրվեց մարզում անասնագլխաքանակի հաշվառման աշխատանքների ընթացքով:
Հ. Սարգսյանը մարզպետարանի աշխատակազմի զարգացման ծրագրերի և վերլուծության բաժնի պետին հանձնարարեց մարզային ներդրումային ծրագրերը կրկին անգամ քննարկել հեղինակների հետ և կատարել անհրաժեշտ շտկումները, իսկ աշխատակազմի կրթության, մշակույթի և սպորտի վարչության պետին հանձնարարեց պատշաճորեն նախապատրաստվել դպրոցական առարկայական օլիմպիադայի մարզային և հանրապետական փուլերին: Մարզպետը նշեց, որ մարզի հանրակրթական դպրոցների աշխատանքների արդյունքները ուղիղ համեմատական են օլիմպիադայի մարզային և հանրապետական փուլերում նրանց սաների ցուցաբերած արդյունքներին:
Խորհրդակցության ամփոփիչ խոսքում մարզի ղեկավարը մարզպետարանի աշխատակազմի ստորաբաժանումների ղեկավարներին տվեց համապատասխան հանձնարարականներ՝ ուղղված ընթացիկ տարվա ընթացքում նրանց կողմից ղեկավարվող ոլորտներում նախատեսվելիք ծրագրերին և շաբաթվա ընթացքում կատարվելիք աշխատանքներին: