Վայոց ձորի մարզպետի աշխատակազմ

  Այսօր ՀՀ Վայոց ձորի մարզպետ Հարություն Սարգսյանի մոտ կայացավ հերթական գործակարգավարական խորհրդակցությունը, որին մասնակցում էին մարզպետի տեղակալները, մարզպետի խորհրդականը, մարզպետարանի աշխատակազմի ղեկավարը և աշխատակազմի ստորաբաժանումների պետերը:

Խորհրդակցության սկզբում մարզպետը խոսեց առաջիկայում ՀՀ վարչապետ Կարեն Կարապետյանի մարզ կատարելիք այցի նախապատրաստական աշխատանքների մասին և հանձնարարություններ տվեց խորհրդակցության մասնակիցներին:
Մարզպետարանի ստորաբաժանումների ղեկավարները հանդես եկան նախորդ խորհրդակցության ընթացքում արձանագրված հանձնարարականների կատարման ընթացքի, անցած շաբաթվա ընթացքում կատարած աշխատանքների և ընթացիկ շաբաթում իրականացվելիք ծրագրերի մասին հաղորդումով:
Խորհրդակցությանը քննարկվեցին Ազատեկի մանկապարտեզի շենքի բնակեցմանը, աշնանացանի ընթացքին, անասնաբուժական ծառայություններին, մարզում մեղվաբուծության զարգացմանը, առողջապահության, կրթության, պատմամշակութային արժեքների պահպանման, հանքարդյունաբերության, հողօգտագործման և հողաշինության ոլորտների խնդիրներին, մարզի համայնքների սեփական եկամուտների հավաքագրմանը, համայնքապետարանների աշխատակազմերում նախատեսվելիք հաստիքացուցակների ողջամտությանը վերբերող հարցեր:
Մարզպետ Հ. Սարգսյանը հանձնարարեց մարզպետարանի աշխատակազմի զարգացման ծրագրերի և վերլուծության բաժնի պետին՝ մարզի զարգացման ծրագրի կազման աշխատանքներում կարևորել գերակա խնդիրները և բիզնես ծրագրերը, որպես  մարզային զարգացման ռազմավարական ծրագրի կարևորագույն բաղկացուցիչ:
Ինչպես միշտ, մարզի ղեկավարը մարզպետարանի աշխատակազմի ստորաբաժանումների ղեկավարներին տվեց համապատասխան հանձնարարականներ՝ ուղղված նրանց կողմից ղեկավարվող ոլորտներում խնդիրների լուծմանը: