Վայոց ձորի մարզպետի աշխատակազմ

Սուրբ Աստվածածնի Վերափոխման տոնը եկեղեցու հինգ տաղավար տոներից չորրորդն է, որն այս տարի Հայ Առաքելական Սուրբ Եկեղեցին տոնեց օգոստոսի 14-ին:Սբ. Աստվածածնի Վերափոխման տոնն այս տարի նույնպես առանձնահատուկ կերպով նշվեց Նորավանքում:
Նորավանքի Սբ. Կարապետ եկեղեցում Սբ. Աստվածածնի Վերափոխմանտոնին նվիրված Սուրբ և Անմահ Պատարագ մատուցվեց: Օրվա պատարագիչն էր Նորավանքի հոգևոր հովիվ Տ. Սեպուհ քահանա Հարությունյանը, ով Սբ. Պատարագի ընթացքում մեկնաբանեց տոնի խորհուրդը:
Սբ. Պատարագից հետո, հանդիսապետությամբ Վայոց ձորի թեմի փոխառաջնորդ Տեր Զարեհ վարդապետ Կաբաղյանի, Սբ. Աստվածածնին նվիրված շարականների երգեցողությամբ, դպրաց դասի և մասնակիցների ուղեկցությամբ, թափորը շարժվեց վանական համալիրի գլխավոր եկեղեցի` Սբ. Ասվածածին եկեղեցի, որտեղ էլ կատարվեց Խաղողօրհնեքի արարողությունը, որի ավարտին Հայր Սուրբը մեկնաբանեց տոնի խորհուրդը՝ կարևորելով հայ կնոջ առաքելապաշտ և հայեցի կերպարը, հայ կնոջ հասարակության մեջ ունեցած դերն ու նշանակություն: Հայր Սուրբը կոչ արեց ներկաներին միասնաբար աղոթելու հայոց ազգի միասնականության,զորության, բարգավաճման և հայոց սահմանների ու հերոս զինվորների անսասանության համար: Արարողության ավարտին օրհնված խաղողը բաժանվեց հավատացյալներին:
Տոնակատարությունը շարունակվեց ՀՀ Վայոց ձորի մարզպետարանի կողմից կազմակերպված մշակութային հանդիսությամբ, որի ընթացքում ելույթ ունեցան Վայոց ձորի շնորհալաի երիտասարդները և պատանիները: Միջոցառմանը մասնակցում էին բազմաթիվ վայոցձորցիներ, զբոսաշրջիկներ և ուխտավորներ Հայաստանի տարբեր մարզերից և արտերկրից:
Տոնի օրը Նորավանքի Մոմիկի անվան թանգարանում ,,Սյունիք-Զարգացում,, ՀԿ-ի բատիկի խմբակի սաները ցուցահանդես էին կազմակերպել:
Նորավանքում տիրում էր հոգևոր-մշակութային մթնոլորտ:
Թող Սուրբ Աստվածածնի բարեխոսությամբ Աստուծո օրհնությունն ու զորությունը մշտապես հովանի լինի Նորավանքի ուխտավորներին և մեր ազգին:

աղբյուրը՝ https://vayotsdzoritem.com