Վայոց ձորի մարզպետի աշխատակազմ

 Այսօր ՀՀ Վայոց ձորի մարզկենտրոն Եղեգնաձոր քաղաքի մարզադաշտում ավարտվեց ՀՀ Նախագահի մրցանակի համար <<Լավագույն մարզական ընտանիք>> ամենամյա մրցույթի մարզային փուլը, որին մասնակցում էին մրցույթի նախորդ՝ տարածաշրջանային փուլում հաղթող ճանաչված 36 ընտանիքները:
Միջոցառմանը ներկա էին ՀՀ Վայոց ձորի մարզպետի տեղակալ Մելս Հարությունյանը, մարզպետարանի աշխատակազմի կրթության, մշակույթի և սպորտի վարչության գլխավոր մասնագետ Աղասի Հովհաննիսյանը, մարզպետարանի աշխատակիցներ, բազմաթիվ եղեգնաձորցիներ:
Նշենք, որ տարածաշրջանային փուլում հաղթող ճանաչված 36 ընտանիքները ՀՀ սպորտի և երիտասարդության հարցերի նախարարության կողմից արժանացան դրամական պարգևների:
Մարզական ընտանիքներն իրենց ուժերը չափում էին 4 տարիքային խմբերում՝ 1-ին` 2008-2010թթ. ծնված երեխա ունեցող ընտանիքներ, 2-րդ` 2005-2007թթ. ծնված երեխա ունեցող ընտանիքներ, 3-րդ` 2002- 2004թթ. ծնված երեխա ունեցող ընտանիքներ և  4-րդ՝ 1999-2001թթ. ծնված երեխա ունեցող ընտանիքներ:
Ինչպես նախորդ՝ 2015 թվականին, այնպես էլ այս տարի լավագույն մարզական ընտանիքի կոչման և ՀՀ Նախագահի մրցանակին արժանանալու համար պայքարելու են նաև հաշմանդամություն ունեցող անդամից բաղկացած ընտանիքներ:
Հուլիսի 18-ից 23-ը Ծաղկաձորում կանցկացվի մրցույթի հանրապետական՝ եզրափակիչ փուլը: ՀՀ Նախագահի մրցանակի համար «Լավագույն մարզական ընտանիք» ամենամյա մրցույթի եզրափակիչ փուլին մասնակցելու համար Վայոց ձորի մարզից կմեկնի մարզային փուլում հաղթող ճանաչված 12 և հաշմանդամություն ունեցող անդամից բաղկացած 1 ընտանիք:
Տեղեկացնենք նաև, որ մրցույթի մարզային փուլում 1-ին, 2-րդ և 3-րդ մրցանակային տեղեր գրաված ընտանքիները Ծաղկաձորում կարժանանան խրախուսական պարգևների: