Վայոց ձորի մարզպետի աշխատակազմ

 Վայոց ձորը ծանր կորուստ կրեց: Կյանքից անժամանակ  հեռացավ ՀՀ մշակույթի վաստակավոր գործիչ, Եղեգնաձորի երաժշտական դպրոցի երկարամյա տնօրեն Ֆիլիպ Հարությունի Բալոյանը: Ընդամենը մեկ տարի առաջ, հոկտեմբերի 1-ին, մենք մեծագույն սիրով և ոգևորությամբ տոնում էինք Ֆիլիպ Բալոյանի ծննդյան 60-ամյա հոբելյանը: Կարճ ապրեց նա, սակայն մեծ հետք թողեց մեր մշակութային կյանքի պատմության մեջ: Առանձնապես մեծ ու անգնահատելի է Ֆիլիպ  Բալոյանի ավանդը մարզում  դասական արվեստի նկատմամբ սեր ու հետաքրքրություն ձևավորելու և մարզի արվեստասեր հասարակայնության ականջին այն ընկալելի դարձնելու գործում:Նա հարգված տնօրեն էր, ցանկալի ընկեր, սիրված հայր և  լավ ամուսին: Անգնահատելի է Ֆիլիպ Բալոյանի մանկավարժական վաստակը: Նա իր տաղանդն անշահախնդրորեն փոխանցում էր իր սաներին` վերածելով նրանց հրաշալի երաժիշտների և երգիչների: Բոլորիս սրտերում հավերժ վառ կմնա նրա պայծառ հիշատակը, իսկ հիշողություններում՝ նրա հնչեղ ձայնն ու անկեղծ ծիծաղը:

 Վայոց ձորի մարզպետը ցավակցում է Ֆիլիպ Բալոյանի ընտանիքին, ընկերներին, բարեկամներին և մարզի  արվեստասեր ողջ հանրությանը` բոլորիս  համար անչափ մեծ ու ծանր կորստի կապակցությամբ:

   Ֆիլիպ Հարությունի Բալոյանը ծնվել է 1952թ. Վայոց ձորի մարզի Եղեգնաձոր քաղաքում: 1968թ. ավարտել է Եղեգնաձորի թիվ 1 միջնակարգ դպրոցը:

1976թ. ավարտել է Երևանի Ա. Բաբաջանյանի անվան երաժշտական ուսումնարանը:

1971-73թթ. ծառայել է խորհրդային բանակում:

1976-78թթ աշխատել է  Դոնեցկի  օպերային  թատրոնում  որպես  մեներգիչ:

1978-1982թթ. սովորել և ավարտել է Երևանի Կոմիտասի անվան պետական կոնսերվատորիայի վոկալի բաժինը:

1982 թվականից Եղեգնաձորի երաժշտական դպրոցի տնօրենն է:

2007 թվականին ՀՀ Նախագահի հրամանագրով Ֆիլիպ Բալոյանն արժանացել է ՀՀ մշակույթի վաստակավոր գործչի կոչման:

2012 թվականին, ծննդյան 60-ամյակի կապակցությամբ, պարգևատրվել է ՀՀ մշակույթի նախարարի ոսկե հուշամեդալով:

Ֆիլիպ Բալոյանի հուղարկավորությունը տեղի կունենա սեպտեմբերի 26-ին, ժամը՝ 12:00-ին, Եղեգնաձորի երաժշտական դպրոցից: