Վայոց ձորի մարզպետի աշխատակազմ

Ջերմուկում այսօր աշխատանքն սկսեց Գյուղական համայնքների երկրորդ համաժողովը, որի նպատակը տեղական ինքնակառավարման համակարգի եւ գյուղական համայնքների ամենաարդիական խնդիրների քննարկումն է` ոլորտում ներգրավված բոլոր դերակատարների մասնակցությամբ:Համաժողովն անցկացվում է արդեն երկրորդ անգամ եւ հավակնում է դառնալ ամենամյա: Առաջին համաժողովն անցկացվել էր անցած տարի` Տեղական ինքնակառավարման համակարգի ներդրման 15-ամյակին նվիրված միջոցառումների շրջանակում:

Համաժողովի լիագումար նիստում ՀՀ վարչապետ Տիգրան Սարգսյանն իր ելույթում նշեց, որ երկխոսության նման ձեւաչափը կառավարությանը հնարավորություն է տալիս ճշգրտել առաջնահերթությունները` համայնքների եւ տարածքային համաչափ զարգացման հարցում, որը հռչակվել է կառավարության հինգ գերակա խնդիրներից մեկը: Տ. Սարգսյանը ընդգծեց, որ համաժողովի ընթացքում արված առաջարկությունները եւ հարցադրումները գտնվելու են ուշադրության կենտրոնում, եւ նախարարությունները հաշվի են առնելու դրանք` համապատասխան ծրագրեր մշակելիս:

ՀՀ փոխվարչապետ, տարածքային կառավարման նախարար Արմեն Գեւորգյանը բացման խոսքում նշեց, որ համաժողովն արդեն դառնում է ավանդական ու եւս մեկ հնարավորություն է ընձեռում միասին քննարկել գյուղական համայնքների զարգացման հետ կապված խնդիրները: "Այս տարի համաժողովի օրակարգում ներառել ենք ՏԻ ոլորտի համար այն առաջնահերթ խնդիրները, որոնք կարեւորվում են նաեւ կառավարության կողմից", -ասաց փոխվարչապետը: Նա հաջողություններ մաղթեց մասնակիցներին` ակնկալելով նաեւ ակտիվ քննարկումներ թեմատիկ աշխատանքային խմբերում:

Համաժողովի մասնակիցներին ողջունեց նաեւ ԱՄՆ Միջազգային զարգացման գործակալության (ՄԶԳ) հայաստանյան գրասենյակի ղեկավար Քարեն Հիլիարդը` անդրադառնալով կազմակերպության կողմից տեղական ինքնակառավարման ոլորտում եւ համայնքներում իրականացվող ծրագրերին: Նա տեղեկացրեց, որ տեղական մակարդակում տնտեսական եւ քաղաքական զարգացմանն ուղղված նախաձեռնություններն առաջիկա հինգ տարիներին եւս ներառված կլինեն ՄԶԳ ծրագրերում: Գրասենյակի ղեկավարը նաեւ հայտնեց, որ ՄԶԳ-ն պատրաստվում է սկսել համայնքների, հատկապես` հեռավոր համայնքների զարգացմանն ուղղված նոր ծրագիր:

"Քաունթերփարթ ինթերնեշնլ" կազմակերպության հայաստանյան գրասենյակի ղեկավար Ալեքս Սարդարն իր ելույթում ծանոթացրեց "Քաղաքացիական հասարակության եւ տեղական ինքնակառավարման աջակցության ծրագրի" շրջանակում կատարված աշխատանքներին եւ ներկայացրեց գյուղական համայնքների զարգացման վերաբերյալ իրենց մոտեցումները: Ըստ նրա` հարակից համայնքներում առկա ռեսուրսները միավորելը միակ ուղին է, որը հնարավորություն կտա համայնքներում ապահովել ամենակարեւոր ծառայությունների մատուցումը:

Ելույթով հանդես եկավ նաեւ Շիրակի մարզի Ախուրիկ գյուղական համայնքի ղեկավար Վարդիթեր Գասպարյանը` խոսելով վերջին տարիներին համայնքում իրականացված աշխատանքների, համայնքի զարգացման ծրագրերի մասին:
Լիագումար նիստից հետո կմեկնարկեն թեմատիկ վեց խմբերի աշխատանքները, որոնց ընթացքում կքննարկվեն տեղական ինքնակառավարման համակարգի ամենաարդիական խնդիրները` տեղական ժողովրդավարությունից մինչեւ համայնքներում հանրային ու մասնավոր հատվածի համագործակցություն:

Համաժողովին մասնակցում են պետական կառավարման մարմինների, համայնքների ու տեղական ինքնակառավարման համակարգի հետ աշխատող տարբեր միջազգային եւ տեղական կազմակերպությունների ներկայացուցիչներ, փորձագետներ: Յուրաքանչյուր մարզ մասնակցում է մարզպետի գլխավորությամբ առանձին պատվիրակությամբ, որի կազմում ընդգրկված է տասը համայնքապետ:

Համաժողովն աշխատանքները կամփոփի հոկտեմբերի 6-ին:

                                                                                                           Աղբյուրը`  mta.gov.am