Վայոց ձորի մարզպետի աշխատակազմ

Ձերդ գերազանցություն պարոնայք դեսպաններ:
Հարգարժան հյուրեր:
Սիրելի հայրենակիցներ:
Ես անչափ ուրախ եմ, որ Հայաստանում Ֆրանկոֆոնիայի շունչը հասել է նաև Եղեգնաձոր, և այսօր մենք հնարավորություն ունեք ունկնդրել մեր դպրոցականների պատրաստած գեղեցիկ միջոցառումը: Ինձ համար մեծագույն հաճույք է այս առիթով Վայոց ձորում հյուրընկալել բարեկամ երկրների դիվանագետների: Ակնհայտ է մի բան. ֆրանսերենով խոսում են հայերին բարեկամ ժողովուրդները: Պատահական չէ, որ այսօր այստեղ գտնվող Ֆրանսիայի, Շվեցարիայի և Լիբանանի դեսպանները ներկայացնում են երկներ, որոնք ճանաչել և դատապարտել են հայերի ցեղասպանությունը:
Անկեղծ ասած ես ֆրանսերեն խոսել չգիտեմ, և դա համարում եմ իմ ամենամեծ թերություններից մեկը: Այս դահլիճում գտնվող ֆրանսախոս բոլոր մարդիկ կարող են հպարտ լինել, որ իրենք տիրապետում են եվրոպական դասական գրականության մայրենի լեզվին, որ իրենք տիրապետում են Միավորված ազգերի կազմակերպության, Եվրոպական Միության և Եվրոպայի Խորհրդի պաշտոնական լեզուներից մեկին, որ իրենք տիրապետում են մի շարք երկներում պաշտոնական համարվող գեղեցիկ, մեղեդային և ականջ շոյող լեզուներից մեկին, որով խոսում է նաև Հայաստանի Ազգային Հերոս Շառլ Ազնավուր:
Երախտիքի խոսքեր եմ ուզում հղել իմ բոլոր այն գործընկերներին, որոնք կազմակերպել են այսօրվա միջոցառումը և հարգարժան հյուրերին, որոնք իրենց ներկայությամբ առանձնահատուկ շուք են հաղորդել դրան: Ես մեծ սիրով, Ձեզ բոլորիդ ասում եմ հայերի կողմից ամենից շատ գործածվող բառը՝ Merci